Cultura

La cuarta edición de POEX, ciclu de llinguaxes poéticos, yá ta en camín. Echa a andar col II Concursu de Videopoemes pa obres audiovisuales n’asturianu o castellanu, que da accesu a la programación oficial a los meyores trabayos presentaos.

Al habitual cursu de llingua asturiana, la Universidá Popular incorpora nesti periodu qu'arranca en febreru a la so ufierta formativa un segundu al rodiu l’idioma. Son unes clases de radioteatru n’asturianu que pretenden “ufrir un conocimientu xeneral del xéneru dramáticu denomináu radioteatru, empobinándolu a la realización de podcast”.

Una vegada pasaes les fiestes navidiegues, la villa yá se prepara pa l’Antroxu. Esti añu esta folixa tradicional va tener el so día grande, el Llunes d’Antroxu, el 20 de febreru, pero l’actividá va principar, como ye vezu nel Antroxu modernu, el Xueves de Comadres, que cai’l 16.

La novela histórica ‘La guerra del Medrosu’ ye la merecedora del II Premiu de Novela Curtia Andrés Solar Santurio. El so autor ye Gonzalo González Barreñada, qu’amosó la so satisfaición por recibir esti gallardón que lleva “un nome tan reconocíu na llingua asturiana”.

Esti 2022 cumple 35 años Dixebra, banda de referencia pa delles xeneraciones d’asturianes y asturianos, aniversariu que llevó al grupu a entamar una esposición que conmemoren estos 7 llustros d’actividá musical y reivindicación. El primer llugar n’acoyela ye Xixón.

Trece semeyes de José Luis Acuña (Foto Acuña) formen el calendariu del 2023 que vienen estos años asoleyando’l Muséu del Pueblu d’Asturies y la Oficina de Normalización Llingüística con gran ésitu. Lleva’l nome de ‘Fecho en Xixón’ y dedícase a la fotografía industrial.

Dos úniques actividaes n’asturianu –que tamién se ponen en castellanu– inclúinse nel programa Navidá nel Botánicu 2022/23. Ye’l cuentacuentos ‘Histories del Arfueyu’, de Factoría Norte, y ‘La maxa del Botánicu’, d’El Circo Bajo el Tejado, mentes qu'un eventu familiar y les cinco visites guiaes restantes son namái en llingua castellana.

Esta selmana van celebrase nel Muséu del Ferrocarril d’Asturies los X Alcuentros de Músiques Asturianes que, baxo la etiqueta ElectronicAst!, ta dedicada esti añu a la música electrónica que se fai n’Asturies ensin arrenunciar al raigañu. Estos díes espublizáronse los trés videos fechos por Tever y Fruela 757 va encargase d’abrir les sesiones.

El conceyal de Cultura, Manuel Ángel Vallina, anunció nel Plenu la recuperación l’añu qu’entra de la campaña ‘Llámalo pol nome, ye lo normal’ pa visibilizar la toponimia tradicional, única oficial dende’l 2006. Fíxolo mientres la respuesta a una entruga de Podemos-EQUO sobre l’ausencia del topónimu ‘Xixón’ n’aiciones y eventos últimos del Ayuntamientu, calificando l'edil de “errores” la falta del mesmu.

Los conciertos de los Alcuentros de Músiques Asturianes conviértense nesta décima edición en sesiones. Esti ciclu mira esti añu a la electrónica ensin arrenunciar al raigañu con cuatro xornaes con Fruela 757, Tasio, Bimenes Underprau y Llevólu’l Sumiciu como protagonistes nun escenariu novedosu: el Muséu del Ferrocarril d’Asturies.