Xixón estrena la esposición que conmemora los 35 años de Dixebra

Esti 2022 cumple 35 años Dixebra, banda de referencia pa delles xeneraciones d’asturianes y asturianos, aniversariu que llevó al grupu a entamar una esposición que conmemoren estos 7 llustros d’actividá musical y reivindicación. El primer llugar n’acoyela ye Xixón.

‘Dixebra. XXXV años de rock n’asturianu’ ta instalada na sala 3 del Centru de Cultura Antiguu Institutu, onde pueden atopase 6 paneles, semeyes y trés vitrines con diferentes materiales de la banda, nes que rescamplen los de los primeros años, que formen parte del archivu de Xune Elipe, cantante de la formación creada na población corverana de Castañeda nel 1987. El visitante tamién va poder visionar media docena d’actuaciones de la banda “dende l’añu 92, que foi la primer vez que salimos a tocar a Euskadi, primer conciertu qu’hai grabáu, hasta l’actualida”, esplicó na inauguración el de Villalegre.

“Nun queríemos una esposición que fora la típica pa única y esclusivamente fans de la banda. Paco Álvarez describióno como los xuglares modernos d’Asturies porque contábemos la realidá d’Asturies al traviés de les nuestres composiciones musicales. Eso ye lo que quiximos facer cola esposición”, resumió.

Asina presenta 6 paneles, ‘Contestu’, ‘Reivindicación llingüística’, ‘Zona conflictiva’, ‘Rock n’asturianu’, ‘Lliteratura’ y ‘Internacionalización’, diseñaos por Eduardo Carruébano con conteníos del propiu Elipe, nos “nos que namás al final se fala de Dixebra”. Los visitantes van tener a la so disposición un programa de mano de la esposición, “que cuasi ye una pieza de coleicionista”, con 16 páxines, material gráficu y un testu de Paco Álvarez y otru del vocalista, “amás d’otros xenéricos sobre la historia de Dixebra”.

L’horariu de visita de ‘Dixebra. XXXV años de rock n’asturianu’, que ye una realidá gracies a la collaboración de la Fundación Municipal de Cultura, Educación y Universidá Popular, al traviés de la Oficina de Normalización Llingüística de Xixón, y la Direición Xeneral de Política Llingüística, ye de 17.30 a 20.30 hores, de llunes a vienres; de 12 a 14 y de 17.30 a 20.30 hores, los sábados; y de 12 a 14 hores, los domingos y festivos, hasta’l día 9 de xineru. Depués la intención de Dixebra ye llevala a otros conceyos del país, con interés de que pueda visitase n’Avilés y Corvera, onde nació la banda, y conversaciones pa que viaxe tamién a Mieres, ente otros posibles llugares.

Conciertu’l día 30

La esposición compleméntase con un conciertu de Dixebra que va tener llugar el vienres 30 na sala Acapulco. Va principiar a les 21.30 y les entraes yá tán a la venta a un preciu de 12 euros (15 na puerta) nel Trisquel (Xixón), L'Esperteyu (Uviéu), El Cafetón (Avilés) y na rede na plataforma Woutick!.