La Universidá Popular crea un cursu de radioteatru n’asturianu

Al habitual cursu de llingua asturiana, la Universidá Popular incorpora nesti periodu qu'arranca en febreru a la so ufierta formativa un segundu al rodiu l’idioma. Son unes clases de radioteatru n’asturianu que pretenden “ufrir un conocimientu xeneral del xéneru dramáticu denomináu radioteatru, empobinándolu a la realización de podcast”.

Pa ellos les alumnes y alumnos van facer dinámiques de conocimientu grupal, exercicios de llectura y d’análisis de testos dramáticos, alderiques y tormentes d’idees, actividaes de declamación, xuegos y exercicios de téunica vocal y d’adautación de testos narrativos a llinguaxe dramáticu, y grabación de testos. Una esperiencia novedosa na que pa participar faen falta conocimientos previos.

Nun ye esti requisitu necesariu nel de ‘Llingua asturiana: iniciación’. Nél va facese una introducción al asturianu dende'l nivel más básicu, apurriendo conteníos gramaticales, vocabulariu, ortografía, exercicios pa trabayar la oralidá y conteníos culturales complementarios.

Entrambos cursos van desenvolvese nel Centru Municipal Integráu de L’Arena, con matrícula abierta dende güei y places llendaes. El de radioteatru va ponese, dende'l 15 de febreru, los llunes y miércoles de 17.30 a 19.30 –podría haber salíes n’otru horariu–, con 30 hores de llargor y un costu de 30 euros, mentes que’l llingüísticu va dase darréu, de 19.30 a 21 y tien una duración de 40 hores y un preciu de 40 euros.

Nesta ocasión la Universidá Popular nun programa cursos en llinia, polo que nun va haber el d’asturianu a distancia. En total ufiértese 124 talleres d’artes escéniques y visuales, artesanía, humanidaes, gastronomía y naturaleza, ciencia y salú.