Xixón yá disfruta l’Antroxu

La llectura del pregón abrió l’Antroxu, que yá tuvo ambiente la nueche anterior con Les Comadres. Cincos díes de mazcaritos y folixa queden per delantre, col Llunes d’Antroxu como día grande, xornaes na que los restoranes de la villa ufren el tradicional menú compuestu por pote, picadiellu y los postres típicos d'esta fecha: frixuelos y picatostes.

Güei arrancó oficialmente l’Antroxu, anque l’ambiente yá se vien notando na villa toos estos díes y vivió una gran xornada ayeri cola celebración de Les Comadres. La reciella yá lluz los sos mazcararitos peles nueses cais, con Begoña como epicentru, asina como dalgunos adultos, anque munchos esperen al llunes p’amarutar.

Ello nun quita pa participar nes munches actividaes programaes, como los pasucais de les charangues o les coples de Jerónimo Grande esta tarde a les 20.30 hores na Plaza Mayor, que da pasu a l’aición d’antroxar la estatua de Pelayo. El XXXV Concursu de Charangues va tener llugar mañana y el domingu a les 19.30 hores nel Teatru Xovellanos, llugar que peles mañana acueye’l Desfile Infantil.

Desfile y verbenes

El Llunes d’Antroxu va celebrase’l gran desfile, con salida a les 19 hores de la plaza de toros. La folixa va allargase esti día hasta bien entrada la madrugada, cola posibilidá d’acudir a dalguna de les trés verbenes previstes a les 22.30 hores: la de Begoña, con D’Cano; la de la plaza 3 d’abril, con Paréntesis; y la de la plaza La República, con Cover.

La gastronomía ye una parte importante tamién del Antroxu, y el martes, fiesta llocal, la mayor parte de los restoranes va poner el Menú d’Antroxu, yá disponible dende güei nos que participen nes xornaes tradicionales entamada pola hostelería. El pote y el picadiellu y los postres tradicionales, como los frixuelos y les picatostes, conformen el mesmu, dulces que tamién van tar presentes en tolos llares estos díes, al igual qu’otros productos procedentes del gochu.

El veloriu d’Isardina Windsurf, la sardina d’esti Antroxu, va ponese a les 17 hores en Begoña y el cortexu fúnebre va principiar a les 19.15. L’entierru va ser n’El Muelle, con llectura del so testamentu sobre les 20.15 hores.

Les xixoneses celebraron Comadres en llocales hosteleros del conceyu. Na semeya, l'ambiente que se vivió ayeri n'El Fugitivo.