Fruela 757 abre les sesiones de los X Alcuentros de Músiques Asturianes 'ElectronicAst!'

Esta selmana van celebrase nel Muséu del Ferrocarril d’Asturies los X Alcuentros de Músiques Asturianes que, baxo la etiqueta ElectronicAst!, ta dedicada esti añu a la música electrónica que se fai n’Asturies ensin arrenunciar al raigañu. Estos díes espublizáronse los trés videos fechos por Tever y Fruela 757 va encargase d’abrir les sesiones.

La Fundación Municipal de Cultura, Educación y Universidá Popular al traviés de la Oficina de Normalización Llingüística de Xixón en collaboración col Taller de Músicos entama los X Alcuentros de Músiques Asturianes, qu’arranca esta tarde, anque les trés creaciones del gaiteru asoleyaes el sábadu, domingu y ayeri sirvieron pa calecer motores de cara a les cuatro sesiones programaes. El primer capítulu lleva'l títulu de 'ElectronicAst! capítulu 1: panorama d'anguaño', el segundu 'Oríxenes y precedentes' y el terceru 'Músiques ensin fronteres', disponibles na canal de YouTube 'Taller de Músicos Gijón-Xixón'.

Estes trés entregues sirven d'introducción a los cuatro conciertos, baxo’l nome de sesiones, programaos ente güei y el vienres nel andén principal del Muséu de Ferrocarril d'Asturies, toos a les 20 hores con entrada llibre, y a la escena electrónica nel país. Fruela 757 va abrir los Alcuentros, pa siguir mañana con Tasio, el xueves con Bimenes UnderPrau y zarrar l'actividá con Llevólu'l Sumiciu.