La Universidá Popular repite’l cursu ‘Llingua asturiana: iniciación’

El xueves 14 va abrir la matrícula pal cursu ‘Llingua asturiana: iniciación’ de la Universidá Popular, únicu n’asturianu al nun convocase nesta edición el de ‘Radioteatru n’asturianu’. La ufierta pa esta seronda complétase con otros 127 cursos de música, cultura, gastronomía, teunoloxía, artesanía, pintura, arquiteutura o xardinería.

El Centru Municipal Integráu de L’Arena repite como sede de les clases d’asturianu, col mesmu horariu. Esto ye, van ponese los llunes y miércoles de 19.30 a 21 hores dende’l 4 d’ochobre pa un total de 40 hores llectives.

Los asistentes van dar una introducción al asturianu dende'l nivel más básicu, recibiendo conteníos gramaticales, vocabulariu, ortografía, exercicios pa trabayar la oralidá y conteníos culturales complementarios. Los temes concretos son: Primeres lleiciones de Gramática (alfabetu, artículu, sustantivu, posesivos, numberales, neutru de materia, etc.); Normes ortográfiques (apóstrofos y contracciones); Hestoria de la llingua asturiana; Variedaes internes del asturianu; Usu oral del asturianu; Lliteratura asturiana; Llectura de llibru; Sociollingüística I; y Vocabulariu I.

El costu del cursu, que va contar con un máximu de 16 alumnes y alumnos, ye de 40 euros. Les persones interesaes en matriculase pueden facelo dende mañana y hasta’l día 29 al traviés de la tarxeta ciudadana nes oficines d’atención a la ciudadanía –con cita previa–, caxeros ciudadanos, Internet o l’aplicación pa móvil ‘Gijón’, teniendo en cuenta que les places van entregase en rigurosu orde d’inscripción.

Pa gran parte de los 128 opciones ufiertaes el plazu yá ta abiertu. En total hai 1.717 places pa opciones mui variaes, dalgunes venceyaes cola cultura asturiana como ‘El prerrománico asturiano’, ‘Gaita’ (iniciación y mediu), ‘Tambor’, ‘Bosques y árboles de Asturias’, ‘Setas en Asturias’ (iniciación y avanzáu) o ‘Baile tradicional asturiano’.

Na semeya, una aula del Centru Municipal Integráu de L'Arena.