L’Ayuntamientu va recuperar la campaña ‘Llámalo pol nome, ye lo normal’ sobre la toponimia oficial del conceyu

|
'Llámalo pol nome, ye lo normal'

El conceyal de Cultura, Manuel Ángel Vallina, anunció nel Plenu la recuperación l’añu qu’entra de la campaña ‘Llámalo pol nome, ye lo normal’ pa visibilizar la toponimia tradicional, única oficial dende’l 2006. Fíxolo mientres la respuesta a una entruga de Podemos-EQUO sobre l’ausencia del topónimu ‘Xixón’ n’aiciones y eventos últimos del Ayuntamientu, calificando l'edil de “errores” la falta del mesmu.

Ésta centrábase en si l’equipu de gobiernu tien previstes midíes “pa que se normalice l’usu del topónimu ‘Xixón’ en tolos eventos organizaos o financiaos pol Ayuntamientu”. La vocera de la coalición, Laura Tuero, qu’emplegó l’asturianu, introduxo la pregunta recordando que’l Plan de Normalización Llingüística actual “afita que tien qu’utilizase’l topónimu ‘Xixón nos eventos” qu’entama’l Conceyu y recordó la polémica ausencia del mesmu nel ATP 250 que se celebró’l mes pasáu nel Palaciu, “onde desapaeció dafechu al paecer por una decisión unillateral de la Federación Española de Tenis”, responsable de la competición, “a pesar de que l’Ayuntamientu de Xixón financiaba con 1,2 millones la organización d’esti tornéu”.

Tamién citó les pallabres de Vallina na Comisión de Servicios y Derechos Sociales nes que confirmó a otra entruga al respeuto de Podemos-EQUO que “nun se quixo entrar en polémica cola Federación”, cuestionándose darréu Tuero –que na so interveción fixo referencia al non emplegu del idioma na illuminación navidiega– si’l Conceyu “fadría esto con toles lleis”.

Na respuesta, l’edil socialista señaló que “nun conceyu tan grande y con una programación tán variada pue haber dalgunos errores, pero nuna gran mayoría cúmplese con ‘Gijón/Xixón”. Sobre l’ATP 250 escusóse con que “Deportes foi l’interlocutor” y apuntó, con respeuto a la illuminación, que n’El Parchís instalóse una estructura con ‘Xixón’.

La vocera de Podemos-EQUO replicó que nes rotondes d’entrada a la villa, onde apaez en grandes lletres ‘Navidad en Gijón’, ta ausente, y espuso otres situaciones onde l’idioma nun tien güecu, como los paneles informativos d’El Molinón o les zones de recarga de los coches llétricos. Reivindicó la obligación del Conceyu de garantizar “el derechu d’usu del asturianu por parte de la ciudadanía”, asina como de “poner en valor del patrimoniu cultural asturianu”, y esixó al equipu de gobiernu “facer daqué, pero de verdá”, al respeuto, anque lo punxo en dulda al valorar que “si nun se cumple con daqué tan cenciello como la toponimia...”.

"Facer pedagoxía"

Foi nesti momentu cuando Vallina anunció “la recuperación l’añu qu’entra de la campaña ‘Lámalo pol nome, ye lo normal’, sobre la toponimia, que tan bien funcionó” nel 2017 y años siguientes. Ésta tenía como función dar visibilidá a los topónimos tradicionales del conceyu aprobaos nel 2006, convirtiéndose éstos nos únicos oficiales.

Tamién espuso la voluntá del equipu de gobiernu de “facer pedagoxía sobre la toponimia de forma periódica”. Por último, l’alcaldesa Ana González Rodríguez, enantes de dar pasu a la siguiente cuestión del Plenu, sorprendió col apunte “el nome del conceyu ye Gijón/Xixón” mirando pa la zona onde taben los ediles de Podemos-EQUO, dando a entender que se pretende sustituyir ún topónimu pol otru cuando lo que reivindica la coalición ye que nun se desplace’l tradicional ‘Xixón’ pola presencia única de ‘Gijón’.

Contador Estadistiques