Cultura

Esti miércoles arranca’l XXII Festival Internacional de Bandes de Gaites Villa de Xixón, que convierte a esti instrumentu en protagonista na villa hasta’l domingu, día nel que va tener llugar la gala na Plaza Mayor. Formaciones d’Alba, Éire, Galicia y Catalunya participen nesti certame.

Con 30.224 visitantes, el Muséu de les Termes Romanes de Campu Valdés convirtióse nel más popular de los municipales nel primer semestre del añu. El Parque Arqueolóxicu-Natural de la Campa Torres y el Muséu del Pueblu d’Asturies son los siguientes de la rede na llista.

El 8 d’agostu va abrise’l plazu de presentación de solicitúes pal IV ‘Xixón Fala en 3’, el concursu que busca fomentar l’emplegu del asturianu pa tratar cualquier tipu de temática. Caltiénense les trés estayes y el valor de les recompenses pa los trés primeros clasificaos na cita que se tresllada al 17 de setiembre col Antiguu Institutu repitiendo como sede.

Dende esti vienres y hasta’l 18 de setiembre van entamase visites guiaes en castellanu a Tabacalera, edificiu que va convertise nun espaciu cultural de diferentes usos, pa lo que se van llevantar otros dos anexos, ún pa dar al conxuntu un auditoriu. Los percorríos, de baldre, van permitir a los xixoneses conocer la so historia y estáu actual.

La fecha nueva ye'l 15 d'ochobre.

Llueu de dos años potenciando l’enrame de fontes aprovechando la situación esceicional pola pandemia, Xixón va poder sumar a esta guapa tradición la quema de fogueres. Agua y fueu, elementos fundamentales pa celebrar San Xuan, que se festexa na sablera d’El Natahoyo, onde nun va entamase conciertu de música tradicional, y en dellos barrios.

Los traxes, del periodu 1880-1920, pertenecen a la coleición de Javier Emperador y van poder visitase hasta xineru.

Del xueves al domingu celébrase la sesta edición de la Feria del Libro de Xixón (FeLiX), que supera un añu más el so récor de participación. Les 57 casetes instalaes en Begoña y la cai Tomás y Valiente van acoyer los puestos de venta, mentes que van entamase actividaes nes dos carpes instalaes, na Escuela de Comerciu y nel Antiguu Institutu.

Ente les decenes d’actividaes de branu qu’entama’l Conceyu namái hai un taller en llingua asturiana. Ye ‘¡Ello yera una vez! ¡Cuentos con munchu arte!’, que se va celebrar en dos turnos, en xunetu y n’agostu, cola collaboración d’Aladanza, y yá tien abierta la matrícula.

La Rula Antigua acueye hasta’l 19 xunu la esposición ‘Xente’ de Pablo Casanueva, una revisión de la estrenada nel 2013 en Ribeseya. L’artista esbilla 17 retratos de los 44 orixinales fechos a mayores del so conceyu cuando tenía 15 años como parte d’un proyeutu que buscaba “responder qué yera o qué queda d’identidá asturiana”.