El IV ‘Xixón Fala en 3’ treslládase a setiembre

|
IV 'Xixón Fala en 3'

El 8 d’agostu va abrise’l plazu de presentación de solicitúes pal IV ‘Xixón Fala en 3’, el concursu que busca fomentar l’emplegu del asturianu pa tratar cualquier tipu de temática. Caltiénense les trés estayes y el valor de les recompenses pa los trés primeros clasificaos na cita que se tresllada al 17 de setiembre col Antiguu Institutu repitiendo como sede.

“Esti concursu ofrez una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante”, apunten les bases del ‘Xixón Fala’ en 3, la iniciativa de la Oficina de Normalización Llingüística na que los participantes van presentar un tema, una idea, una investigación, un proyeutu, un problema social, etc., “con munchu procuru y cola mayor calidá llingüística posible énte un públicu non especializao, xeneralista y variao”. Pa ello tienen 3 minutos de tiempu xustos, lo qu’eleva la dificultá de la esposición, “d’una manera clara y concisa” y con “un rexistru cultu”.

Les trés estayes del concursu son cultura y tradición asturiana, nel que tratar temes d’antropoloxía, toponimia, baille, historia o sociollingüística, ente otros; de divulgación xeneral; y el de mocedá, destinada pa persones de 14 a 18 años, que pueden tocar cualquier temática. El ganador de caún d’elles va recibir 600 euros, mentes que los segundos lleven 275 y los terceros, 125.

Hasta’l 5 de setiembre

El plazu d’inscripción va tar abiertu del 8 d’agostu al 5 de setiembre, mentres que’l ‘Xixón Fala en 3’ va celebrase’l sábadu 17 de setiembre a les 11 hores nel salón d’actos del Centru de Cultura Antiguu Institutu. El xuráu va valorar tanto la calidá espositiva y la capacidá de síntesis como la calidá llingüística, la oratoria y la capacidá de comunicación de les persones participantes.

Los ganadores na edición anterior, celebrada en febreru del 2021, foron Arantza Margolles, na estaya de cultura y realidá asturiana, con ‘Superstición y malos vezos relixosos. La Inquisición n’Asturies nel casu de Pedro Alonso’; Xandru Armesto, na de divulgación con ‘Actuaciones educatives d’éxitu’; y Alma Hidalgo, na de mocedá, con ‘Lorca, sangre asturiana’.

AdxuntuTamañu
PDF icon Bases IV 'Xixón Fala en 3'1.64 MB
Contador Estadistiques