La XXXI Fiesta de la Sidra Natural encara les sos actividaes principales

El Récor Mundial d'Escanciáu, los cantares de chigre y la preba tienen llugar estos díes.

L'apertura'l vienres pasáu del Mercadín de la Sidra y la Mazana instaláu nos Xardinos de la Reina sirvió de pistoletazu a la XXXI Fiesta de la Sidra Natural, con delles actividaes estos díes. Esta fin de selmana la gran celebración dedicada al nuesa bébora nacional encara les sos actividaes centrales, les más tradicionales.

Asina esta tarde, a les 20.30 hores va intentase un añu más superar el Récor Mundial d'Escanciáu Simultaneu, pa lo qu'hai que llegar a los 9.722 echadores de sidra na sablera d'El Natahoyo. La baxada a la playa y repartu de botelles va principiar dos hores y media enantes.

Mañana, a les 21 hores van entamase un gran coru na Plaza Mayor pa interpretar los tradicionales cantares de chigre en compañía de la Sociedad Torner, cola posibilidá d'ensayalos esta mesma nueche a les 22 hores. Yá'l domingu va tener llugar nesi allugamientu la preba de sidre, de 12 a 14 hores; la entrega del Premiu a la Meyor Sidra de la Fiesta de la Sidra Natural de Xixón 2022; y del Eloxu d'Oru, qu'esti añu recibe Jaime García Poo, fundador de la empresa corchera Casa Víctor.