El Conceyu entama visites guiaes a Tabacalera pa dar a conocer la so historia y l’estáu del edificiu

Dende esti vienres y hasta’l 18 de setiembre van entamase visites guiaes en castellanu a Tabacalera, edificiu que va convertise nun espaciu cultural de diferentes usos, pa lo que se van llevantar otros dos anexos, ún pa dar al conxuntu un auditoriu. Los percorríos, de baldre, van permitir a los xixoneses conocer la so historia y estáu actual.

D’un llargor d’una hora y con grupos d’un máximo de 15 persones, va dar a conocer la entrada (per María Bandujo), el patiu y el depósitu romanu, la entrada meridional, la ilesia y el sector septentrional. Les esplicaciones van apoyase nuna esposición asitiada nos diferentes espacios con información sobre los planos, afayos y reconstrucciones hipotétiques de la época romana y medieval, y semeyes, ente otros.

L’edificiu de l’antigua Fábrica de Tabacos ye la síntesis de distintes fases históriques d’ocupación, cumpliendo funciones diferentes dende la esistencia d’un pozu-depósitu nel llugar a lo últimu del sieglu III o l’entamu del IV, la construcción d’un conventu d’estilu barrocu que tuvo ocupación del 1671 al 1843 y el so usu industrial dende esi añu al 2002 con delles actuaciones nestos dos sieglos últimos. Les visites van tener llugar los llunes, miércoles, vienres y domingos a les 12.30 hores, y los sábados a les 12.30 y a les 18 hores, y pa participar ye necesario acutar plaza nel teléfonu 985.18.52.34.

Na semeya, visita guiada al edificiu entamada pol equipu de gobiernu municipal a los grupos políticos en mayu.