El III ‘Xixón Fala en 3’ yá recibe propuestes pa defender el 20 de febreru

El 20 de febreru, la xornada previa a la celebración del Día de la Llingua Materna, ye la fecha escoyida pa la celebración del III ‘Xixón Fala en 3’, el concursu que busca fomentar l’usu del asturianu pa tratar cualesquier temática. Dende esti xueves y hasta’l 14 de febreru ta abierta la inscripción nes trés categoríes.

“Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante”, apunten dende la Oficina de Normalización Llingüística. No que cinca al públicu, “ye una perbona manera d’abrir mires y d’averase a un conocimientu, anque seya esbozáu, de temes mui estremaos”, añaden.

El formatu va ser el mesmu que nes dos ediciones previes. Cada participante tien “3 minutos esautos” pa esponer el tema escoyíu, “d’una manera clara y concisa”, pa lo qu’ha d’emplegar l’asturianu nun “rexistru cultu”.

Tamién se caltienen les trés categoríes del añu pasáu. La A correspuende a la Cultura y Realidá asturiana, onde van poder tratase temes d’antropoloxía, toponimia, baille, historia o sociollingüística, ente otros, y na B compiten los concursantes que presenten temes de divulgación non necesariamente venceyaos a Asturies, mentes que la C ye un amiestu de les dos pa les moces y mozos de 14 a 18 años.

Final en principio presencial

El ganador de caúna de les trés estayes va recibir 600 euros de recompensa, mentes que la de los segundos y terceros va ser de 275 y 125, de manera respeutiva. Nel casu de que la situación sanitaria nun permita celebrar l’actividá de forma presencial nel salón d’actos del Centru de Cultura Antiguu Institutu a les 11 hores del 20 de febreru –les persones que quieran acudir como públicu yá pueden acutar asientu nel corréu electrónicu llinguaasturiana@xixon.es–, ‘Xixón Fala en 3’ entamaráse per videoconferencia.

Na edición pasada, celebrada n’avientu del 2019, el vencederor na categoría A foi Inaciu Galán con ‘L’asturianu nel franquismu: Amigos del Bable’ y nel B, Marcos Antonio Álvarez Costales con ‘Privacidá n’Internet’. Mentes la meyor en categoría moza foi Celia Corrales con 'Salú mental: la importancia de lo invisible’.

La xente interesao en concursar na tercer edición de ‘Xixón Fala en 3’ tien hasta’l 14 de febreru pa presentar la solicitú, formalizada d’alcuerdu con esti formulariu, nel Rexistru Electrónicu operativu les 24 hores del día, nel Rexistru de la Fundación Municipal de Cultura, Educación y Universidá Popular o na Rede Municipal d’Oficines d’Atención a la Ciudadanía del Conceyu de Xixón, amás de nos sitios de procedimientu alministrativu común de les alministraciones públiques.

Na semeya, un momentu de la entrega de premios de la segunda edición del 'Xixón Fala en 3'.