Xixón priende les fogueres per San Xuan

Llueu de dos años potenciando l’enrame de fontes aprovechando la situación esceicional pola pandemia, Xixón va poder sumar a esta guapa tradición la quema de fogueres. Agua y fueu, elementos fundamentales pa celebrar San Xuan, que se festexa na sablera d’El Natahoyo, onde nun va entamase conciertu de música tradicional, y en dellos barrios.

San Xuan celebra’l solsticiu de branu, que realmente ye nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista. Esta tradición de raigaños celtes que recibía’l nome d’Alban Heruin fai cultu al sol al traviés del fueu y al agua, d’ehí el prendíu de fogueres y l’enramáu de fontes.

La quema que concentra más xente ye la qu’entama’l Conceyu na sablera d’El Natahoyo, que torna a escaecer el conciertu de música tradicional que venía entamando tolos años. A les 23.15 hores van facer un pasucais les bandes de gaites Villa de Xixón y Noega, pa entamar col prendíu de la foguera a medianueche y al llanzamientu de fueos artificiales.

Xove, Mareo, Cimavilla y Contrueces entamen tamién celebraciones de diferentes tipos. La celebrada en Leorio, alloñada de la tradición, ye la más multitudinaria, col reclamu esti añu de la conocida orquesta gallega Panorama.

L’enramáu de fontes con actuaciones de grupos tradicionales van tener llugar na so mayor parte a les 20 hores: Coros y Danzas del Real Grupo de Cultura Covadonga va facelo en La Guía; Música y Baile Tradicional Excelsior, en La Rionda de Caldones; La Alegría, en La Pipa; Los Xustos, en Zarracina; El Turruxón, en Fonfría; Andecha de Cultura Tradicional Na Señardá, na fonte de Pelayo; Flor de Xaranzaina, na fonte de la plaza Clara Ferrer; Asociación Coros y Danzas Jovellanos, en Begoña; y Trebeyu, na Fonte de la Fábrica del Gas. A les 20.30 hores van facelo Xiringüelu, en Deva, y El Xolgoriu, en Laviada.