El XXIII Festival Internacional de Bandes de Gaites Villa de Xixón anima la ciudá

Una folixa nel Muséu del Pueblu d'Asturies y la gala na Plaza Mayor ponen el ramu al certame qu'esti añu cuenta con agrupaciones de tradición asturiana, bretona y gallega.

Dende'l miércoles ye fácil sentir nun paséu pel centru de la villa soníos de gaita. Ta celebrándose'l XXIII Festival Internacional de Bandes de Gaites Villa de Xixón, qu'axunta a dos centenares de músicos procedente de dellos países.

Dende Trélazé, población asitiada nel departamentu francés de Maine-et-Loire, aportó la Bagad Men Glaz, formada por emigrantes bretones; de la Comunidad de Madrid la Banda de Gaitas Lume de Biqueira y dende Catalunya, l'Agrupación Artística Gallega Rosalía de Castro, tamién por persones que salieron de la so tierra, nesti casu Galicia; y d'Asturies la Banda de Gaites Villa de Jovellanos y la Banda de Gaites de Villaviciosa-El Gaitero xunto cola anfitriona Banda de Gaites Villa de Xixón y la so banda infantil, Magüeta. Les de fuera yá debutaron ayeri en dellos puntos de la villa, mentes que les d'equí van axuntase mañana na Gala del XXIII Festival Internacional de Bandes de Gaites Villa de Xixón, a les 21.45 hores na Plaza Mayor, con desfile previu a les 20 hores de los Xardinos de la Reina a la Plaza Mayor, onde representantes del Club de las Guisanderas van lleer pregón de la Selmana Grande

Güei les trés convidaes tamién van tar nel Muséu del Pueblu d'Asturies, onde hai actividá dende'l meudía. Amás de les sos actuaciones (16 hores) va haber una preba de cerveza asturiano a cargu de Nurias Castro (17 hores), una amuesa de baltu y una recreación de llucha histórica na Edá del Fierro (18 hores), entamaes pola Lliga Celta d'Asturies, xuegos asturianos (18 hores) y conciertos de Lume Celtic Band (20 hores) y Burbús (21 hores).

Na semeya, una danza esta mañana nel tendayu del Muséu del Pueblu d'Asturies, onde hai comida y bébora.