Arranca Al Resve con un conciertu inaugural a cargu d'Anabel Santiago

Burbús, Algaire, Alicia Álvarez o 6 Riales protagonicen dalgunes de les actuaciones de les primeres xornaes del festival de Cimavilla.

Esta nueche echa a andar el III Festival Al Resve, que programa 16 actividaes de música, teatu y pasucais pa estos cinco díes y del 16 al 18, coincidiendo coles fiestes del barriu altu. Nelles tien especial protagonismu la música tradicional y les propuestes qu'innoven a partir d'ella.

Anabel Santiago encárgase a les 22 hores, na plaza La Soledá, del conciertu inaugural, nel que la cantante va centrase nos cantares de 'Y andá', el so discu últimu. Mañana a les 13 hores David Varela va presentar nesi mesmu sitiu l'actividá 'Restolando' enfocada pa la reciella, mentes qu'a les 20.30 hores va actuar Burbús na plaza Xovellanos.

Completen l'actividá estos primeros díes Algaire, el vienres a les 20.30 hores na plaza Arturo Arias (El Llavaderu); el conciertu infantil 'Cuentos de La Fabriquina' con Alicia Álvarez y el propiu Varela, el sábadu a les 13 hores en la plaza La Corrada; y Urso Dakoff esi mesmu día a les 20 hores en La Soleda, mentes qu'l baille asturianu va tener protagonismu a les 21 hores en La Soledá. Pal domingu ta prevista la presencia de la escuela de música tradicional El Trubiecu xunto con Abéu a les 13 hores na plaza Xovellanos.

Verbenes en L'Atalaya

Al Resve forma parte esti añu de les fiestes de Cimavilla, qu'esta fin de selmana festexa Los Remedios. Asina van entamase actividaes per tol barriu y verbenes en L'Atalaya, que van animar Pasito Show (güei), Gaudí (mañana), Grupo Eleven (vienres) y Assia (sábadu).