Actualidá

Esti vienres arranca la Navidá en Xixón col prendíu de la illuminación navidiega y l’apertura de MeNaX, el mercáu que s’instala tolos años nel paséu de Begoña. Son más de 1.000 los arcos y figures instalaes nesta ocasión, ente les que rescampla la d’El Parchís na que se pue lleer Xixón en grande y la enorme estrella fugaz d’El Náutico.

Con testos namái en castellanu y col topónimu ‘Gijón’ nel únicu logu visible estrenáronse los paneles informativos nuevos d’El Molinón. Iniciativa pol Asturianu denuncia l’ausencia dafechu del asturianu nellos y reclama’l cumplimientu de la toponimia oficial por parte del Conceyu.

‘(Sobre)vivir n’Asturies. Presente y futuru del territoriu y la so población’ ye’l títulu de les primeres xornaes qu’entama Grana, asociación creada n’alcordanza de Yolanda González Huergo pa xenerar espacios de reflexón y esparder la forma de ver el mundu de la xixonesa. Va axuntar a espertos na materia en dos sesiones, vienres y sábadu, nel Centru de Cultura Antiguu Institutu.

El topónimu ‘Xixón’ tuvo ausente del Palaciu y de tola cartelería del ATP 250 de Xixón magar el pidimientu fechu pol Conceyu pa que s’utilizara xunto con ‘Gijón’ al ser la forma oficial la billingüe ‘Gijón/Xixón’. La Real Federación Española de Tenis (RFTE) negóse, según confirmó l’edil Manuel Ángel Vallina a Podemos-EQUO.

Podemos-EQUO censura que’l Conceyu “nun mirara pol usu del topónimu ‘Xixón’ nel tornéu ATP 250” que se celebró la selmana pasada nel Palaciu de Deportes. La so vocera, Laura Tuero, considera que “nun ta habiendo avances significativos” nel emplegu de la forma asturiana “esti mandatu” y recuerda la poca actividá del Conseyu Asesor.

El nome del tornéu ATP 250 que se ta celebrando esta selmana nel Palaciu de Deportes, Gijón Open, yá dexaba fuera’l topónimu 'Xixón', pero la presencia d’ésti tamién desapaeció dafechu na instalación municipal. La forma oficial pa la ciudá ye la billingüe 'Gijón/Xixón' y el Plan de Normalización Llingüística 2020-2023 manda’l so usu.

L’independiente Luis Manuel Flórez ‘Floro’ va ser el candidatu del PSOE nes eleiciones de mayu llueu de ganar les primaries a Ana Puerto por una diferencia amplia. El partíu qu’encabeza agora’l gobiernu municipal espera caltener l’Alcaldía cola convocatoria d'esta consulta pola militancia que llevó a l’alcaldesa Ana González Rodríguez a apartase.

D'ella formen parte 76 ciudaes de 3 estaos.

Un día depués de confirmase que los promotores de la celebración de primaries nel PSOE de Xixón pa escoyer el candidatu a l’Alcaldía algamaben los apoyos suficientes pa convocales, Ana González Rodríguez anunció la so decisión de dar un pasu a un llau. Nun va presentase, anque va escosar el so mandatu.

Sacante l’ordinariu, que caltién un costu de 1,50 euros, el restu de billetes d’autobús de la Empresa Municipal de Tresportes Urbanos (EMTUSA) van contar con un 30 por cientu de descuentu dende’l 1 de setiembre en beneficiu de los usuarios de tarxetes y d’abonos nes sos diferentes categoríes. Estos precios van caltenese hasta fin d’añu.