El topónimu 'Xixón' desapaez del Palaciu de Deportes pal ATP 250
- El topónimu 'Xixón' pierde presencia nes aiciones del Conceyu
- El topónimu 'Xixón' gana visibilidá nel Palaciu
- Carreño cumple nel debut nel ATP 250 de Xixón y pasa a cuartos col apoyu de l'afición
- “Nun ta habiendo avances significativos nel usu del topónimu ‘Xixón’ esti mandatu”, apunta Tuero
- El Conceyu pidió a la Federación Española de Tenis l’usu de la toponimia oficial y ésta negóse
|
13 Ochobre, 2022 por Pablo R. Guardado
- Log in to post comments
El nome del tornéu ATP 250 que se ta celebrando esta selmana nel Palaciu de Deportes, Gijón Open, yá dexaba fuera’l topónimu 'Xixón', pero la presencia d’ésti tamién desapaeció dafechu na instalación municipal. La forma oficial pa la ciudá ye la billingüe 'Gijón/Xixón' y el Plan de Normalización Llingüística 2020-2023 manda’l so usu.
Pablo Carreño, Andy Murray, Andrey Rublev, Roberto Bautista o Dominic Thiem, dalgunes de les meyores raquetes del circuitu, tán xugando estos díes en Xixón nun tornéu que namái compite en feches con otru ATP 250, el de Firenze. Un cartelu de primer nivel que fai que’l focu del tenis mundial tea puestu estos díes na ciudá.
Sicasí, esti tornéu de repercusión internacional, entamáu pola Real Federación Española de Tenis con una aportación del Conceyu de 1,2 millones d’euros, reflexa namái una realidá, desaniciando dafechu’l topónimu 'Xixón', oficial en forma billingüe. Nel propiu nome del tornéu y nos trofeos, na cartelería y na publicidá instalada en pista, 'Gijón' rescampla en solitariu, incumpliendo’l Plan de Normalización Llingüística 2020-2023.
La presencia de 'Xixón' ye ún de los mandaos del documentu aprobáu en Plenu, qu’afita’l “usu del logotipu del Conceyu n’asturianu o billingüe nes dependencies municipales, nos vehículos, paneles y lletreros de víes públiques y edificios municipales” y marca “rotular gradualmente les diferentes dependencies municipales tanto de la Casa Conceyu como de les distintes empreses municipales, empreses mixtes, organismos autónomos (Centros municipales, instalaciones deportives, Museos, oficines d’EMA y EMULSA, Centros de Mayores, Escueles, Parque Móvil Municipal, etc.)”. Sicasí, la sensación ye la d’un retrocesu nel usu del topónimu 'Xixón' en detrimentu de 'Gijón' que s’agrava estos díes cola so desapaición nel Palaciu de Deportes, instalación municipal onde les dos formes conviven a lo llargo del añu.
Na semeya, partíu de la previa del Gijón Open ente Carlos Taberner y Filip Cristian Jianu qu'abrió la previa y el tornéu'l sábadu pasáu.
