Xixón va incorporase n'ochobre a la rede Ciudaes que Caminen

D'ella formen parte 76 ciudaes de 3 estaos.

Nel marcu de la Selmana Europea de la Movilidá, que se ta celebrando estos díes, el conceyal de Mediu Ambiente y Movilidá, Aurelio Martín, anunció la futura incorporación de Xixón a la rede Ciudaes que Caminen. Fíxolo en compañía d'Ana Montalbán, coordinadora téunica d'esta asociación internacional ensin ánimu d'arriquecimientu que trabaya por que los peatones sían los máximos protagonistes de la movilidá urbana y del espaciu públicu.

La esperta dio una charra na carpa instalada pola Selmana sobre qué aiciones pueden entamase en Xixón pa dar más prioridá a los ciudadanos que se desplacen a pie. Cola integración del conceyu nesta rede, qu'ha confirmase nel Plenu d'ochobre, l'Ayuntamientu comprométese a esti ameyoramientu del espaciu pal peatón y nel fomentu de los trayeutos a pie como yá fixeren previamente poblaciones como Zalla, Bilbao, Narón, Ferrol, A Coruña o Ponferrada na nuesa redolada.

Primer panel

Nesta xornada instalóse tamién el primer panel de MinutoXixón, el mapa peatonal qu'amuesa'l tiempu que se tarda caleyando ente difefentes puntos de la villa. Ésti asitióse na avenida d'El Molinón, una zona recuperada pal paséu.