Carreño cumple nel debut nel ATP 250 de Xixón y pasa a cuartos col apoyu de l'afición

Va tener como rival al francés Arthur Rinderknech llueu de superar al brasileñu Thiago Monteiro por 6-4 y 7-6 (7-3).

El suañu de Pablo Carreño de xugar un tornéu ATP en casa cumplióse ayeri, a lo menos na categoría individual, yá que previamente xugara'l dobles, ensin fortuna. El xixonés debutó nel Gijón Open, un ATP 250, nun Palaciu de Deportes cerca del enllenu y nun defraudó, algamando'l pase a cuartos de final.

El cabeza de serie númberu 2 trató de quitar los comprensibles nervios dende los primeros instantes y consiguiólo, al romper el serviciu de Monteiro en dos ocasiones pa ponese 5-1. Sicasí, el suramericanu vendió cara la so piel y llegó a colocase 5-4.

Carreño, col apoyu del públicu, ganaría darréu'l so saque pa llevar el primer set. Nun lo tendría tampoco facíl nel segundu, que tuvo que decidise nel tie break, allargándose'l partíu en cuasi dos hores.

Cuartos de final

El rival mañana del xixonés en cuartos de final va ser Rinderknech, qu'eliminó en primer ronda al tamién francés Benjamin Bonzi por 6-4 y 7-5. Otru duelu confirmáu, na otra parte del cuadru, ye'l Francisco Cerúndolo-Dominic Thiem.

Mentes, ta xugándose nel momentu de la redaición d'esta noticia l'Andrey Rublev-Ilya Ivashka, con ventaya pal rusu nel primer set, na que'l ganador cruzaría con Tommy Paul, y Sebastian Korda-Roberto Bautista, choque del que va tar pendiente Andy Murray. El vencedor d'esta última eliminatoria sería l'openente de Carreño nunes hipotétiques semifinales del sábadu.

Na semeya, primeros instantes del duelu ente Carreño y Monteiro, col brasileñu, de verde, sacando.