Nin l’asturianu nin el topónimu ‘Xixón’ apaecen nos paneles informativos nuevos d’El Molinón

Con testos namái en castellanu y col topónimu ‘Gijón’ nel únicu logu visible estrenáronse los paneles informativos nuevos d’El Molinón. Iniciativa pol Asturianu denuncia l’ausencia dafechu del asturianu nellos y reclama’l cumplimientu de la toponimia oficial por parte del Conceyu.

La organización presentó una reclamación nel Rexistu “pa que l’asturianu tea presente nes pantalles informatives instalaes recién nos aparcaderos del estadiu” p’anunciar los díes de pieslle por cuenta de los partíos del Sporting. L’Estáu ta en nivel 4 d’alerta terrorista –hai 5–, de riesgu altu, dende’l 26 de xunu del 2015, con especial atención a la seguridá n’eventos multitudinarios.

El plan pa El Molinón reforzóse nel 2017 cola prohibición d’aparcar en tol perímetru del campu y non en determinaes zones, como hasta esi momentu. Los coches qu’en día de partíu siguen aparcaos son retiraos pola grúa, lo que xeneró delles quexes pola falta d’información al respeuto.

Por esi motivu, el Conceyu instaló agora estos paneles qu’indiquen, namái en castellanu, el día de pieslle. Iniciativa pol Asturianu llamenta “l’ausencia del asturianu nunos elementos nos que la presencia del idioma nun xeneraría costu adicional, sinón que los mensaxes podríen intercalase y apurrise de forma billingüe. Aprovechando l’usu de la electrónica na cartelería, sedría bien interesante la presencia del asturianu pola so visibilidá de les informaciones (díes, hores…)”.

Tamién reclama l’usu de la toponimia oficial nes pantalles, “onde namás ta presente’l topónimu ‘Gijón’”. Recuerda que “dende setiembre de 2006 la forma tradicional ‘Xixón’” tamién ta reconocida nel na forma billingüe ‘Gijón/Xixón’.

Na semeya, el panel asitiáu na entrada al aparcamientu pela zona del fondu sur.