Los billetes d’autobús van tener un 30 por cientu de descuentu dende’l día 1

Sacante l’ordinariu, que caltién un costu de 1,50 euros, el restu de billetes d’autobús de la Empresa Municipal de Tresportes Urbanos (EMTUSA) van contar con un 30 por cientu de descuentu dende’l 1 de setiembre en beneficiu de los usuarios de tarxetes y d’abonos nes sos diferentes categoríes. Estos precios van caltenese hasta fin d’añu.

El decretu aprobáu en xunu pol Gobiernu estatal p’afrontar la crisis poles consecuencies de la guerra d’Ucraína incluyía descuentos del 50 por cientu nos abonos ferroviarios, pero tamién pal tresporte públicu d’ámbitu llocal y autonómicu del 30 por cientu, cola posibilididá de qu’estes alministraciones lu amplíen colos sos propios recursos hasta’l 50. Nel casu de Xixón van quedar nesi 30 por cientu inicial, como confirmen los precios anunciaos güei por EMTUSA.

Asina, con tarxeta’l preciu del viaxe n’autobús pasa de 0,75 a 0,53 euros, mentes que los abonos mensuales, que taben en 39,70 queden en 27,79. Toles categoríes tienen rebaxa a esceición del billete ordinariu, que se caltién 1,50 euros, preciu del mesmu dende’l 1 de xineru llueu d’un aumentu de 25 céntimos.