Moriyón da'l pasu de presentase a l'Alcaldía

La presidenta de Foro y primer edil ente los años 2011 y 2019 va comunicalo a la militancia y simpatizantes na espicha navidiega del partíu.

Depués d'un periodu llargu de reflexón, la decisión yá ta tomada: Carmen Moriyón va presentase a l'Alcaldía de Xixón nes eleiciones del 28 de mayu. Va ser la tercer ocasión na que lo faiga cola intención de tornar a disputar el bastón de mandu al PSOE, que presenta a Luis Manuel Flórez ‘Floro’, les dos anteriores con ésitu, anque namái en 2015 resultó la más votada.

Nel 2011 algamó 9 conceyales polos 10 del socialista Santiago Martínez Argüelles, pero l'apoyu del PP na investidura con 5 ediles permitió'l cambiu de color nel Conceyu al contar Izquierda Xunida namái con 3. Cuatro años más tarde sumó 8 y el candidatu del PSOE, José María Pérez, 7, ensin alcuerdu na izquierda pa sofitalu.

Álvaro Muñiz sería nel 2019 el candidatu municipal de Foro al pasar la ciruxana a liderar la llista nacional, con malos resultaos pa los dos, yá que los socialistes Ana González Rodríguez y Adrián Barbón ganaríen les eleiciones. Agora ella torna a la política municipal, dalgo que va anunciar esta nueche nel Llagar Castañón, en Quintueles, a la militancia y que ta acabante de comunicar en redes sociales "dende'l convencimientu de que, si trabayamos duro, lo meyor pa Xixón ta por llegar".