El topónimu 'Xixón' gana visibilidá nel Palaciu

El llateral del Palaciu de Deportes torna a llucir los dos topónimos oficiales de la ciudá, 'Xixón' y 'Gijón'. El pabellón principal del conceyu asitió una de les llones coloraes col logu 'Gijón' na parte superior, dexando espaciu pa colocar otra blanca col de 'Xixón' na parte baxa de la grada, na ‘u’ televisiva, ganando asina visibilidá.

YeXixón informaba’l mes pasáu de la presencia mínima de 'Xixón' nel Palaciu frente a la única forma oficial hasta’l 2006 xunto cola so ausencia na programación navidiega de la ciudá. La situación na instalación deportiva xunto al Piles iguóse a lo poco, con un mayor pesu del logu cola forma tradicional.

La presencia d’ésti ye ún de los mandaos del Plan de Normalización Llingüística 2020-2023. Asina afita’l “usu del logotipu del Conceyu n’asturianu o billingüe nes dependencies municipales, nos vehículos, paneles y lletreros de víes públiques y edificios municipales” y marca “rotular gradualmente les diferentes dependencies municipales tanto de la Casa Conceyu como de les distintes empreses municipales, empreses mixtes, organismos autónomos (Centros municipales, instalaciones deportives, Museos, oficines d’EMA y EMULSA, Centros de Mayores, Escueles, Parque Móvil Municipal, etc.)”.

Na semeya superior, estáu actual. Na inferior, un momentu del descansu del partíu del sábadu pasáu ente'l Círculo y el Tarazona Universidad de Burgos, y situación anterior.