Actualidá

Ana González solicitó al Gobiernu nel Comité de Crisis de COVID tres l'estáu d'alarma que'l zarru nun quedara namái pa la zona urbana.

La intención de l'alcaldesa que coincide cola del primer edil d'Uviéu, Alfredo Canteli, ye que'l confinamientu perimetral en vigor dende'l sábadu, y que se caltién tamién tres la decisión del Executivu nacional de pesllar Asturies dende'l miércoles, fora pa tol conceyu, al igual que se decidió p'Avilés. Y asina treslladólu na xunta celebrada na tarde d'ayeri.

Una incidencia acumulada de 353 casos de COVID-19 cada 100.000 habitantes nos 14 díes últimos llevó al Gobiernu a establecer un confinamientu perimetral en Xixón. Les zones afeutaes son la urbana y zones rurales, anque l’alcaldesa Ana González insiste n’amplialu a tol conceyu al igual que se-y permitió'l sábadu a Avilés.

La situación sanitaria na que ta anguaño Xixón pola pandemia de COVID-19, con Cabueñes saturáu, sobre manera n’Urxencies, llevó al SESPA a solicitar al Exércitu la instalación de puestos de cribáu nel aparcamientu del hospital. Esti vienres principiaron los trabayos, cola intención de que'l llunes puedan empezar a funcionar.

El 1 de payares ye'l día de mayor asistencia a los cementerios de Ciares, Xove y Deva.

El plan anti-covid del Conceyu de cara a Tolos Santos consiste nun conxuntu de midíes de prevención desendolcaes por CEGISA, la empresa que xestiona los cementerios municipales, pa garantizar la seguranza y evitar axuntamientos importantes de persones. Una de les propuestes ye encamentar a los ciudadanos a visitar les tumbes de los sos seres queríos el día 2 o nes xornaes previes, dende'l 24, con un refuerciu de la llinia 25 qu'enllaz Deva cola villa.

Baxo’l nome de ‘Protéxite contra’l gripe. Vacúnate. Failo por ti y polos que t’arrodien’ arrancó la campaña de vacunación d’esti añu contra esta enfermerdá, que se desendolca nun contestu marcáu pola pandemia de COVID-19. El Palaciu de Deportes foi’l primer de los siete puntos habilitaos nel conceyu n’abrir les sos puertes.

El porcentaxe n'agostu foi del 65,1 por cientu.

Xixón consiguió aguantar meyor esti branu turísticu marcáu pola pandemia de COVID-19 que les sos vecines. Nel octavu mes del añu, según los datos facilitaos pol Instituto Nacional de Estadística (INE), la tasa d'ocupación hotelera baxó un 24,4 por cientu, mentes que la media na nomada 'España Verde' foi del 32,7 por cientu.

La Conseyería de Salú declaró l’alerta naranxa en Xixón pol aumentu progresivu de la incidencia de COVID-19 nel conceyu, que ye de 154 positivos de COVID-19 por cada 100.000 habitantes nos 14 díes últimos, superior a la media del país, de 122. Va aumentar la rigurosidá n'aplicación de les midíes de prevención, proteición y seguranza.

Hasta'l momentu detectáronse 13 positivos.

La Conseyería de Salú fixo na tarde d'ayeri un llamamientu a los veceros del Vaya Bull y Bora-Bora, chigres d'alterne asitiaos nel polígonu industrial de Porceyo, qu'acudieren ente los días 10 y 26 de septiembre pa facer un estudiu ampliáu de contautos por mor d'un biltu de coronavirus SARS-CoV-2. Pa ello han de rellenar esti formulariu o llamar al númberu de teléfonu 984.10.00.51.

N’asturianu, en castellanu y n’inglés. Son les trés llingües nes que se pue escoyer pa utilizar l’aplicación nueva d’EMTUSA, que vien a sustituyir l’anterior –entovía activa– p’adaptase a les necesidaes actuales de los usuarios, anque la toponimia qu’ufre ye la castellanizada, yá derogada.

Xixón súmase un añu más a la Selmana Europea de la Movilidá. Del 16 al 22 de setiembre la ciudá va poner el focu nes consecuencies negatives del usu irracional de los vehículos a motor en zones urbanes, emponderando la utilización del tresporte públicu y la bicicleta, nesta ocasión col lema ‘Por una movilidá ensin emisiones’.