Xixón súmase a la Selmana de les Lletres

|
Xixón súmase a la Selmana de les Lletres

Delles actividaes tienen la ciudá como sede, amás de les programaes pol SNL llocal.

Esti vienres comenzó la XXXIX Selmana de les Lletres Asturianes, con más de venti actividaes hasta'l día 8 en nueve conceyos del país, ente ellos Xixón. El primeru foi, esta mañana, la inauguración de la esposición ‘Falar ensin parar’, con testos de Carlos González Espina y ilustraciones de Marina Lobo, que va poder visitase hasta'l domingu 20 de mayu nel Centru de Cultura Antiguu Institutu.

Tamién dientro de la programación oficial de la Conseyería d'Educación y Cultura va celebrase'l martes una visita guiada n'asturianu per Cimavilla dende les 19.30 hores. Ésta ye de baldre, pero ye necesario acutar plaza, con plazu hasta güei al traviés del númberu de télefonu 985.106.741 o del corréu electrónicu splnormalizacion@asturias.org.

El xueves 3, a les 18 hores, el Teatru de la Llaboral va acoyer la gala d’entrega de premios del V Certame de Teatru Escolar, nel que van representase toles obres premiaes, mentes que'l llunes 7, nesi mesmu llugar, lalumnáu de Primaria va poder disfrutar a les 11 hores de la obra 'El viaxe de Dorothy', de Fantastique Company.

Tamién la Oficina Municipal de la Llingua

La Oficina Municipal de la Llingua tamién pon en marcha actividaes coincidiendo cola Selmana de les Lletres Asturianes. Asina entama, en collaboración cola Unión de Comerciantes del Principado de Asturias, la campaña 'Comercios con munchu cuentu', cola fin d'averar la lliteratura infantil y xuvenil a los comercios de la ciudá de Xixón.

Asina, dende güei y hasta'l día 8, va poder vese nos escaparates de les tiendes participantes una amuesa d’obres infantiles n’asturianu, llibros que tán disponibles pal so empréstamu na Rede Municipal de Biblioteques de Xixón. Hai que destacar qu'esti añu la gran celebración al rodiu les nueses lletres ta dedicada a la lliteratura infantil y xuvenil.

Precisamente les biblioteques de la ciudá espublicen a comuña col SNL xixonés una guía de llectura infantil cola fin de sirvir d'ayuda a rapacines y rapacinos, families y profesoráu. Otra manera, tán programaes pal miércoles 2 y el miércoles 9 sesiones de cuentacuentos nel Centru de Cultura Antiguu Institutu a cargu d'Olga Cuervo.

 

Contador Estadistiques