L’apuesta d’Orlegi pal Mundial ye un estadiu modular pa llegar a los 45.000 espectadores

Alejadro Irarragorri tuvo una apretada axenda na so vuelta a Asturies, con aconceyamientu conxuntu en Presidencia col Gobiernu y el Conceyu, y Xunta Xeneral Ordinaria n’El Molinón depués. El presidente d’Orlegi Sports y del conseyu d’alministración del Sporting salió del alcuentru con un alcuerdu a trés bandes p’apostar por Xixón como sede.

La carrera pa ser sede del Mundial 2030, una vegada confirmáu España como ún de los estaos organizadores, lleva tiempu en marcha, pero va encarar el so esprín final. A él llega El Molinón descolgáu del grupu de favoritos, pero hai esperanza en llegar a tiempu.

Ye’l mensaxe que dexaron Irarragorri y les dos alministraciones, representaes, ente otros, pol presidente Adrián Barbón y l'alcadesa Carmen Moriyón, depués del aconceyamientu d’esta mañana a les 9 hores, una vegada qu’Orlegi presentó un proyeutu redimensionáu, como pidía’l Conceyu, y nel mesmu allugamientu, ensin necesidá de mover el campu, única manera de caltener l’antigüedá d’El Molinón. Un cambiu que reduz la inversión necesaria de los 300 millones necesarios a la metá.

L’apuesta d’Orlegi ye un campu modular que permita llegar a los 45.000 espectadores qu’esixe la FIFA pa depués desmontar parte pa quedar colos 30.000 actuales. Una posibilidá que yá s’emplegó en Qatar.

Queda por conocer el proyeutu definitivu, asina como la financiación, cuestión que sigue xenerando duldes de puertes p’afuera. L’arquiteutu Fernando Sordo, encargáu del primer diseñu, tuvo presente nel aconceyamientu.

Aprobaos tolos puntos del orde del día

El mexicanu desplazóse darréu a El Molinón pa presidir la Xunta Xeneral Ordinaria d’Aicionistes, nel que tuvo representáu’l 87 por cientu del capital social. Orlegi consiguió aprobar tolos puntos del orde del día por unanimidá nuna cita que duró poco más de media hora.

El presupuestu pa la temporada 22-23 ye de 22,6 millones, exerciciu nel qu’hai previstes unes perdes de 5,8 millones. Nel anterior foron de 5,1, cuando taben plantegaos 6,9.

Ente les anuncies daes por Irarragorri rescampló la so decisión de nun tocar la finca La Marruca, que l’anterior propiedá mercó por 2,3 millones d’euros con fondos CVC, hasta’l puntu de dexar cayer la posibilidá de vendera si llegara una ufiera. Tamién soprendió apuntando que na obra fecha nel prau d’El Molinón aprovechóse pa igualar el campu, que contaba con una pequeña inclinación.

En Copa en Salamanca

No deportivo, el Sporting xuega mañana contra Unionistas (16 hores, Reina Sofía) el partíu de segunda ronda de Copa con 700 sportinguistes na grada. Ramírez reservó a Yáñez, Cote, Róber Pier y Roque Mesa pal choque contra l’equipu de Primera RFEF.