El Teslacard quier facer los deberes pa siguir otru añu en LEB Plata

|
Palaciu de Deportes Teslacard Círculo

Los xixoneses han de ganar al Hestia Menorca nel Palaciu y esperar una derrota del filial del Baskonia o del Torrons Vicens L'Hospitalet.

La xornada cabera del grupu A2 de LEB Plata, nel que se llucha pola permanencia na tercer categoría del basket estatal, va xugase con horariu unificáu mañana a les 20 hores. El Teslacard Círculo llega a la cita decisiva con una gran dinámica, sumando cuatro trunfos siguíos que, sicasí, son insuficientes pa depender de sí mesmo.

Los de Nacho Galán han de ganar a un Menorca que yá tien plaza na LEB Plata del añu próximu y llueu esperar que'l Grupo Eleyco Baskonia nun gane nel so llar al Arcos Albacete o que'l L'Hospitalet pierda na so visita al Extremadura Plasencia, rivales que tampoco nun se xueguen nada. Con Saúl Blanco en forma, una de les claves de la remontada, el Teslacard espera l'ayuda de los aficionaos al baloncestu de Xixón pa sacar un trunfu imprescindible pa siguir soñando.

Contador Estadistiques