El Círculo baxa a EBA pero nun descarta contar con plaza en LEB Plata

|
Teslacard Círculo 72-80 Hestia Menorca

El club solicita'l sofitu del Conceyu y de patrocinadores tres meter más de 1.000 persones nel Palaciu de forma habitual.

Nun pudo ser y el Teslacard Círculo perdió la categoría tres cayer 72-80 col Hestia Menorca. Los de Nacho Galán necesitaben ganar y esperar a una derrota del del filial del Baskonia o del Torrons Vicens L'Hospitalet, qu'al final nun se produxo, yá que los vascos vencieron 70-65 al Arcos Albacete y los catalanes 58-66 al Extremadura Plasencia.

D'esta forma, el conxuntu xixonés baxa a EBA xunto colos estremeños, l'Ávila Auténtica, el Vic, el Jafep La Roda y el Quesería La Antigua Tormes. Sicasí, el fechu de quedar en sétimu llugar permite al Círculo contar con derechos deportivos nel casu de que dalgún de los qu'asciendan u otru equipu de la categoría renuncie a la so plaza.

Dende'l club xixonés valoren como mui positiva la vuelta d'un equipu xixonés a la categoría profesional tres la desapaición del Gijón Baloncesto nel 2009 por motivos económicos. L'afición al baloncestu na ciudá ye un fechu y les entraes esti añu a los partíos amuesen l'interés esistente por esti deporte.

Sicasí, el Círculo demanda apoyu dende'l Conceyu y de los patrocinadores, denunciando güei que Teslacard, el principal esta temporada, namái abonó mientres dos meses y mediu'l so compromisu.

Na semeya, imaxe que presentaba esta xornada la grada principal del Palaciu.

Contador Estadistiques