El Sporting B va xugar col Elche tres derrotar en Mareo al Cornellà

Los de José Alberto foron mui superiores a los catalanes y acceden a la segunda ronda pol ascensu a Segunda División A.

El filial roxiblancu foi meyor que'l Cornellà na vuelta celebrada en Mareo, ganando por 2-0 (4-2 nel global) gracies al tantu tempraneru de Cayarga (minutu 3) y al de Nacho Méndez nel tramu final (84). D'esta forma sigue nel so camín hacia Segunda División A, onde van tener como rival a un clásicu del fútbol estatal, l'Elche, col partíu d'ida'l domingu a les 19 hores nel Martínez Valero (LaLiga 1|2|3 TV).

El conxuntu d'Elx quedó terceru nel grupu III, el mesmu del Cornellà, con 3 puntos más que los catalanes. Al pasar dos cuartos clasificaos, éstos van enfrentase a los dos primeros que perdieron, el Mirandés y el Cartagena, mentes que la imposibilidá del Villarreal B de cruciase con otru del so grupu lleva a los castellonenses a vese les cares col Fuenlabrada y a los asturianos colos alicantinos.

D'esta forma, asina queden les elminatories: Elche-Sporting B, Fuenlabrada-Villarreal B, Extremadura UD-Mirandés y Celta B-Cartagena. Mentes, yá son equipos de Segunda'l Mallorca y el Rayo Majadahonda.

Pacheta, entrenador ilicitanu

Entrenáu por l'ex téunicu del Uviéu Pacheta, l'oxetivu únicu del Elche ye l'ascensu tres perder la categoría l'añu pasáu. El club d'Elx, con 21 temporaes en Primera Divisón, la última na 2014-2015, onde sufrió un descensu alministrativu, caltién a un xugador del so pasu per l'agora nomada LaLiga Santander, el capitán Edu Albacar –lesionáu–, y futbolistes con una trayeutoria amplia nel fútbol profesional como Benja o'l goliador Nino, un delanteru que siempre sonó pa reforciar al Sporting.

Na primer ronda, los ilicitanos eliminaron al Murcia tres ganar en La Condomina por 0-1 y nel Martínez Valero por 3-2 nun partíu que los de Pacheta controlaron en too momentu.