El Proyeutu de Plan de Normalización Llingüística 2020-2023 aporta al Conseyu Asesor

88 propuestes componen el Proyeutu de Plan de Normalización Llingüística 2020-2023, que yá ta en manes de los partíos y coleutivos que participen nel Conseyu Asesor de la Llingua de Xixón. El so oxetivu ye "intensificar les aiciones a favor del asturianu p'algamar asina mayores cotes de normalización del so usu".

El Plan vien a sustituyir al aprobáu pol Plenu pal periodu 2016-2019, anque nun aporta munches novedaes con respeuto a ésti. Estructúrase en cinco puntos (Alministración pública; enseñanza, tresmisión familiar y mocedá; socioeconómicu: comerciu y hostelería; ociu, deporte y actividá cultural; y medios de comunicación y nueves teunoloxíes) y cuenta con 88 midíes colos sos correspondiente plazos de cumplimientu.

Tres la presentación ayeri al Conseyu Asesor de la Llingua de Xixón, creóse una Comisión pal so estudiu y posible modificación enantes de devolvelu al Conseyu Asesor. El siguiente pasu será llevalu a Plenu pa la so aprobación y puesta en marcha.

Na semeya, Antón García, direutor xeneral de Política Llingüística; Miguel Barrero, direutor de la Fundación Municipal de Cultura, Educación y Universidá Popular; Alberto Ferrao, conceyal d'Educación y Cultura; y María Xosé Rodríguez López, responsable de la Oficina de Normalización Llingüística, presidiendo la xunta d'ayeri del Conseyu Asesor de la Llingua de Xixón.