El Bigues i Riells, rival del Telecable en Copa

|
Sortéu Copa 2018-2019 h.oquei patinos

Va celebrase en formatu de final a 8 del 21 al 24 nel Pavelló Olímpic Municipal de Reus.

El sortéu de Copa celebráu ayeri en Reus crució al Telecable Hockey Club col a priori meyor rival de los posibles: el Club Hoquei Patins Bigues i Riells (vienres 22, 17.15 hores). El conxuntu catalán, que tien en plantiya a la ex portera xixonesa Kristina Klein, ocupa la octava plaza –la última que da'l pase– de la OK Lliga femenina de ḥoquei sobre patinos, con 20 puntos, 11 menos que l'equipu de La Calzada, terceru a 5 del líder, el Generali HC Palau, que tien un partíu más.

Nel casu de pasar, les de Fernando Sierra van vese les cares col ganador del choque ente'l Generali y el Vila-sana, polo qu'eviten al favoritu y bestia negra de les asturianes esta campaña, el Manlleu, hasta la posible final. El Telecable, que suma 3 títulos nesta competición (2012, 2013 y 2016), ye l'actual subcampeón: l'añu pasáu perdió contra l'anfitrión, el Calmar CP Vilanova, non clasificáu esti añu, por 2-1 nel partíu decisivu.

El restu de crucies que salieron del sortéu foron Voltregà-Las Rozas y Manlleu-Cerdanyola. Otra manera, y como novedá, esti añu la Copa femenina va coincidir en fecha y plaza cola masculina.

Semeya propiedá de la Real Federación Española de Patinaxe (RFEP).

AdxuntuTamañu
Image icon Cuadru Copa 2018-2019262.04 KB
Contador Estadistiques