Viquingos en Xixón

Orixinarios d’Escandinavia, los viquingos son un pueblu qu’enllenaron páxines de llibros y hores de producciones cinematográfiques o televisives. Hai munchos mitos alredor d’ellos, pero lo que tenemos constancia ye que llanzaron ataques per mar nel norte d’Europa mientres los sieglos VIII y XI, y que tuvieron presencia en numberosos llugares, ente ellos Asturies en tiempos de la monarquía asturiana.

La ‘Crónica Albeldense’ rellata que la primer venida de navegantes viquingos a Asturies foi nel reináu de Ramiro I, nel añu 844, refiriéndose a ellos como normandos. Sicasí, una anotación d’Ibn Al-Athir cita la participación d’un guerreru coles tropes del rei Alfonso II contra los musulmanes nel 795 que podría ser viquingu.

Xixón foi ún de los llugares per onde pasaron los viquingos esi 844, anque poco se sabe d’esti fechu. El 31 de xunetu o’l 1 d’agostu viéronse nel horizonte cien embarcaciones que se cree que nun llegaron a desembarcar o que namái aprovecharon la so presencia na villa p’abastecese d’agua, ensin qu’haya referencia d’incidentes ente viquingos y xixoneses en crónica nenguna.

Semeya: Cuernos vikingos alcontraos en Sutton Hoo (Inglaterra)