La Supercopa de ḥoquei patinos yá ta en La Calzada

El Telecable Xixón Solimar sigue sumando ésitos. La única copa estatal que nun algamara entovía, la Supercopa, tornéu que celebraba en Vila-sana esta fin de selmana, viaxó a La Calzada llueu de superar en semifinales al Martinelia Manlleu (1-2) y na final al Generali HC Palau de Plegamans (0-1), verdugu na temporada pasada n'Europa y en Lliga.

L’entamu de Ramón Peralta como entrenador del conxuntu xixonés nun pudo ser meyor. Dos primeros partíos, dos victories y títulu.

Tuvieron bien les xixoneses el sábadu nes semifinales contra les campeones de Copa magar lo axustáu del resultáu, pero la ventaya de dos goles gracies al aciertu del fichaxe Ana Catarina y de Natasha Lee foron suficientes pa superar a les catalanes, que, sicasí, apretaron al final con un gol de Canal cuando quedaben 11 minutos. Na otra eliminatoria, el Palau superaba a les anfitriones por 4-3.

Repetíase asina la final de la Female League Cup europea y de la OK Lliga de la temporada pasada, anque nesta ocasión la celebración caería del llau asturianu. Un tantu de Marta Piquero al aprovechar una falta direuta a 12 minutos de la conclusión sería suficiente pal trunfu del Telecable, que suma asina la Supercopa de ḥoquei patinos femenín a los sos 5 títulos europeos, les sos 3 lligues y les sos 4 copes.

Na imaxe, les xugadores del Telecable col títulu a lo so llegada de madrugada a Xixón. Semeya propiedá del CP Gijón Solimar.