La Guerra d'Independencia

La Guerra d'Independencia

La nomada Guerra de la Independencia (1808-1814) contra la Francia napoleónica representó un fechu perimportante na historia asturiana cola declaración de soberanía de la Xunta Xeneral del Principáu d'Asturies el 25 de mayu del 1808.

Esta declaración llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

Xixón nun foi ayena a esti conflictu políticu y militar. Nesti pequeñu resume cronolóxicu repasamos los acontecimientos asocedios na nuesa villa mentantu la guerra contra los franceses:

27/04/1808 Primer engarradiella. El consul frances Miguel Lagonnier tira dende los balcones de la so casa (cai Corrida) unes fueyes metiéndose cola casa real española y pidiendo a los españoles aceptar como monarca a José Bonaparte. La xente aconceyada na cai rompió los papeles, glayó contra Lagonnier y los franceses y apedrió la casa. El consul y la so familia fuxeron pela nueche y abellugáronse nun barcu francés atracáu nes agües de San Llorienzu.

09/05/1808 Recibióse en Xixón el bandu del xeneral Murat del 3 de mayu en Madrid onde contaba la sublemación de Madrid del día 2 y daba anuncia de les saciones por participar en protestes y tener posesión d'armes. Cuando'l comandante d'armes, escoltáu pol Reximimientu Provincial, procedía a la llectura del bandu, foron atacaos pol públicu, qu'impidió la publicación del bandu.

25/05/1808 La mañana del 25 de mayu la Xunta Xeneral proclamábase soberana, declaraba la guerra a Francia y nomaba embaxadores n'Inglaterra pa solicitar ayuda militar. Aniciábase asina la formación del Exércitu Defensivu Asturianu. Esti pasu dau n'Uviéu nun tenía la intención de constituyir un estáu independiente, sinón proclamar que nun s'almitía'l dominiu francés y que puxaba por Fernando VII, lo que nun quita que mayu del 1808 supunxera un procesu d'autodeterminación coleutiva afitada nun sentimientu identitariu profundu, exemplificáu na creación de la bandera d'Asturies, mui asemeyada a l'actual, y el propiu nome col que los asturianos nomaron al so exércitu.

30/05/1808 Colen del puertu de Xixón los comisionaos pola Xunta Soberana pa dar anuncia al Rei d'Inglaterra de la declaración de guerra d'Asturies a Francia y pidir sofitu.

27/07/1808 Aporten a Xixón los representantes ingleses con seis barcos que trayíen unes 3.000 tonelaes de suministros militares que se guardaron en Contrueces, onde 20.000 homes  esperaben les órdenes pa entrar en combate.

19/05/1809 A mediaos de mayu entren les tropes franceses n'Asturies per tres frentes, l'occidente, l'oriente y el sur, esto ye, l'Eo, Ribadeva y el puertu Payares. El 19, el xeneral Mathieu avanza sobre Xixón, venciendo la resistencia y la villa al mandu del gobernador militar José Pescy capituló. Les tropes franceses saquiaron la villa, abandonándola'l 6 de xunu.

01/02/1810 Tornen los franceses a Xixón. En febreru y marzu tuvieron entrando y saliendo per 3 veces, pa volver a ocupala definitivamente dende'l 31 de marzu fortificando L'Atalaya y otros llugares de Xixón, como la cai San Bernardo.

16/10/1810 Tropes al mandu de Porlier ataquen Xixón y al día siguiente llega a agües de San Llorienzu una escuadra de 30 barcos que, mandaos pol mariscal Renovales, desembarquen el día 18 n'Arnáu, fuxendo los franceses escontra Uviéu perseguíos poles guerrilles.

19/10/1810 El xeneral Bonet, aprovechando'l repliege de les tropes de Renovales y Porlier, asitia Xixón y, depués de 24 hores, entra nella. Yá en Xixón, valtia toles muries y fortificaciones y reprime a la poca población que quedaba na villa, "pescadores de Cimavilla que nun temen al peligru y escasa guarnición", en pallabres del Conde de Toreno.
14/06/1811: Los franceses abandonen Xixón presionaos dende mar y tierra. L'institutu Asturianu, Capiya de Santa Catalina, Palaciu del Marqués de San Esteban usáronse como cuarteles y sufrieron daños, al igual que la torre de la Colexata de San Xuan Bautista por mor de los bombardeos de la escuadra de Renovales.

06/08/1811 Torna Gaspar Melchor de Xovellanos.

07/11/1811 La villa ye otra vuelta ocupada pola francesada. 

21/01/1812 Los franceses abandonen Xixón y yá nun tornarán. Arramplen y embarquen nos sos buques abondes ayalgues y faen españar el depósitu de polvora de L'Atalaya. Con esti fechu dase por finada la Guerra d'Independencia en Xixón.

Contador Estadistiques