El Telecable de Peralta arranca la temporada na Supercopa col enfotu de llevar el títulu a casa

Con cuatro cares nueves y relevu nel bancu afronta’l Telecable la temporada nueva. L’equipu de La Calzada de ḥoquei patinos femenín, agora baxo’l mandu de Ramón Peralta, quier quitase el mal sabor de boca de los subcampeonatos de Lliga y Europa del añu pasáu col primer títulu cola Supercopa, onde espera’l Martinelia Manlleu.

Cuatro equipos disputen esti tornéu estrenáu la temporada pasada que llevó’l Generali HC Palau de Plegamans, verdugu de les xixoneses en semifinales (5-2) y nes otres dos finales celebraes na temporada. Nesta ocasión los dos equipos veríense nuna hipotética final nel casu de superar al campeón de Copa, el Manlleu (10.30 hores), y a les anfitriones Vila-Sana (13 hores) nel crucie de les catalanes.

Esta campaña’l Telecable Xixón Solimar preséntase con cambiu nel bancu al pasar Fernando Sierra a los despachos pa ocupase de la direición deportiva del club. L’escoyíu pa liderar al equipu ye Peralta, téunicu asturianu asturianu con una llarega esperiencia que vien d’entrenar al Bigues i Riells.

L’equipu caltién gran parte de la plantía, con cuatro incorporaciones: les moces Judith Cobián (Areces Ecopilas Asturhockey) y Ainara Anido (Cuenques Mineres), la porteres Victoria Novo (Areces Ecopilas Asturhockey) y la portuguesa Ana Catarina (Sporting Clube de Portugal). Ente les baxes, rescampla les d’Elena Lolo y Eva Mejido.

Pa la Supercopa, que va poder siguise en direuto per Esport3, Lleida TV y OK Liga TV, Peralta va disponer de toles sos xugadores col oxetivu de ganar esti títulu per primer vegada na historia del Telecable. La final ta prevista pal domingu a les 13 hores.