El Telecable nun-y pierde’l gustu a ganar

Quintu títulu siguíu pal Telecable. Les moces de La Calzada ganaron la Supercopa al derrotar na final de Cubelles al Vila-sana Cooperativa d’Ivars na tanda de penaltis tres finar el tiempu de xuegu ensin goles nel marcador y al Martinelia Club Patí Manlleu en semifinales (3-1) y siguen cola racha trunfal qu'arrancó l'añu pasáu tamién en Catalunya.

Si la temporada pasada foron cuatro de cuatro los títulos algamaos pol Club Patín Gijón Solimar, Telecable por cuestiones de patrociniu, na actual la dinámica sigue igual. Agora con Natasha Lee, una de les protagonistes del añu máxicu pal ḥoquei patinos femenín asturianu, na figura d’entrenador, fixóse col títulu qu’abre la temporada, la Supercopa.

Foi lloñe de casa, en Catalunya, con dos bones actuaciones que finaron en victoria. La primera en semifinales col Manlleu, mesmu rival que la temporada pasada, por 3-1, y la segunda nuna final contra Vila-sana na que les porteres foron les protagonistes.

Nun se movió’l marcador nin nel tiempu reglamentariu nin na prórroga, polo que tuvo que decidise’l títulu a los penaltis. Ehí tuvieron más acertaes les asturianes y los tantos de Sara Roces y Nuria Almeida permitieron llevar la Supercopa de vuelta a Xixón al anotar peles catalanes namái María Porta.

Títulu númeru 17

Ésti ye’l decimosétimu campeonatu oficial que gana’l Telecable, qu’acumula 6 copes d’Europa, 4 lligues, 5 copes y 2 supercopes. Agora, depués de la celebración, la vista queda puesta na OK Lliga Iberdrola, que va arrancar el sábadu nel pabellón de Mata-Xove a les 19.15 hores cola visita del Bembibre.

Semeya de David Valiente-RFEP.