El Telecable gana la Copa, el so tercer títulu de la temporada

|
Telecable cola Copa (3-1 con Palau'l 14 de mayu del 2023)

Supercopa, WSE Champions League y la Copa. El Telecable sigue la so marcha trunfal esta temporada ganando tolos títulos posibles depués de derrotar en Calafell al Generali Palau de Plegamans por 3-1 y, llueu del llargu viaxe y celebración, yá tien la mente puesta na OK Lliga.

L’añu de debú de Ramón Peralta como téunicu de Club Patín Solimar, Telecable por cuestiones de patrociniu, nun pue ser meyor. En Calafell certificó’l terceru depués de dexar nel camín al Lidergrip Mataró (5-1) y al rival na final europea, el Vila-sana (4-2), y superar nel partíu decisivu a la bestia negra de les xixoneses la temporada pasada, al que tamién derrotaran en setiembre na Supercopa (1-0).

Tardaría n’abrise’l marcador, 18 minutos, cuando Sara Roces anotaba a la segunda un penalti cometíu sobre Natasha Lee. El 2-0 tamién se fadría esperar, nel 37, nuna bona aición d’Almeida, pa sentenciar poco después Piquero.

El tantu del honor del equipu catalán llegaría por mediación de Florenza a falta d’un minutu pal final. Celebración na cancha y na grada nel sector de desplazaos dende Asturies pa festexar la quinta Copa de la historia del club.

Piquero sería declarada meyor xugadora de la final y Lee, que se retira esta temporada, recibió un homenaxe sorpresa de la Real Federación Española de Patinaxe (RFEP) pola so trayeutoria. Con esta victoria’l Telecable pasa a tener na so vitrina 6 copes d’Europa, 3 lligues, 5 copes y 1 Supercopa.

Play-off pol títulu con Vila-sana

Les xixoneses entovía pueden facer plenu de títulos esti añu al tar clasificaes na OK Lliga Iberdrola como terceres pa les eliminatories a trés partíos de les que sal el campeón. El sábadu en Mata-Xove va recibir al Vila-Sana a les 19.15 hores, mentes que van devolver la visita a Catalunya’l vienres siguiente a les 20.30 hores.

L’otru enfrentamientu crucia al Martinelia Manlleu col Generali Palau, campeón de la lliga regular, con primer alcuentru tamién el sábadu, a les 17 hores. El segundu coincide n’hora col del Telecable.

Na imaxe, les xugadores y cuerpu téunicu del Telecable posen cola Copa. Semeya obra de Luis Velasco-RFEP.

Contador Estadistiques