XsP desmárcase del Festival Arcu Atlánticu pol vetu al actu de la Xunta pola Defensa de la Llingua Asturiana

|
Mario Suárez del Fueyo (XsP)

La Fundación Municipal de Cultura (FMC) denegó'l permisu a la Xunta pola Defensa de la Llingua Asturiana (XDLA) pa presentar nel Festival Arcu Atlánticu d'anguaño la charla Proyectu 2018, una iniciativa pa poner en marcha una reforma estatuaria al traviés del artículu 56.1.

Dende l'alministración del conceyu consideróse que la iniciativa “nun encaxa bien cola filosofía del Arcu Atlánticu” y atalántase que ye “una visión del fechu llingüísticu mui venceyada a la política que desdibuxa la idea del Festival na que venimos trabayando dende la primer edición”, se diz nuna comunicación que la FMC unvió a la XDLA. Nesti sen, dende la Conceyala de Cultura y Educación del Ayuntamientu de Xixón propónse a l'asociación en defensa l'idioma que “dea una vuelta” a la iniciativa pa “plantegala dende una posición más abierta, más plural”.

Pa Xixón Sí Puede (XsP) esta negativa de la FMC a conceder l'espaciu a la Xunta pola Defensa de la Llingua por presentar una propuesta “mui venceyada a la política” suena-yos a censura. “Estes palabres escuenden un vetu a les idees y a la llibre espresión que nun se pue consentir dende una institución democrática. Por esti motivu, demandamos al equipu de Gobiernu que rectifique nel intre y llevante'l vetu a una organización que nestos años nun fixo otro que mirar pola supervivencia la llingua, supliendo l'arrequexamientu al que la vienen sometiendo les alministraciones asturianes”, afirma Mario Suárez del Fueyo, portavoz de XsP.

Al empar, abulta que cola actitú de la Conceyalía de Cultura quier tapecese la propia visión política que se caltién dende la institución municipal de la llingua y la cultura asturiana: “El marcu políticu y xurídicu nel que se desenvuelve una llingua ye clave p'atalantar cuála ye la so situación y cuál pue ser el so futuru, asina que nun tien xacíu nengún torgar una charla na que precisamente se va a falar d'esi marcu nel contestu d'un Festival dedicáu a les llingües minorizaes. A nun ser, claro ta, que lo que se quiera ye evitar falar del ruinu marcu actual al que dellos partíos, ente ellos Foro, condenen a la llingua asturiana”, continúa Del Fueyo.

Nel casu de que la Conceyalía de Cultura caltenga la so decisión de censurar la llibre espresión nel Arcu Atlánticu, “a XsP nun-y queda otra que retirar el so sofitu a un eventu qu'había servir pa dar un pasu alantre pa la supervivencia de la llingua asturiana y nun ser un simple escaparate nel que se dexa ver cómo da les boquiaes una parte fundamental del nuestru patrimoniu inmaterial”, alvierte el portavoz de XsP.

Contador Estadistiques