Xixón yá tien guía Lonely Planet.

|
Xixón yá tien guía Lonely Planet.

La estaya de Turismu de Divertia Gijón (Xixón Turismu) robló un alcuerdu con Prisma Publicaciones, editora de la revista n’España, pa ellaborar una guía de la ciudá so la perconocida marca turística.

La guía, de 48 páxines, espublizóse en castellán y va tornase al inglés y francés. Va sirvir pa promocionar Xixón como destín turísticu. Editáronse 30.000 exemplares dafechu, que van distribuyise col númberu de marzu de la revista Lonely Planet en Madrid, Barcelona, Euskadi, Castiella y Llión y Galicia, mercaos que’l Plan d’Aición de Turismu de Xixón 2016-2020 afita como prioritarios p’atrayer turistes.

Darréu, la guía de Xixón va repartise nes oficines d’información turística Infoxixón, nes feries turístiques nes que s’afaye Xixón Turismu y nes aiciones promocionales qu’entame.

La guía inclúi información xeneral sobro la ciudá, los sos atractivos turísticos y los llugares a visitar y reportaxes sobro la hestoria, la gastronomía y la sidra, la cultura y les tradiciones, actividaes en familia, sableres y puertos, compres, sendes y naturaleza, turismu activu, accesibilidá y sostenibilidá. Tamién inclúi les cites imprescindibles de l’axenda cultural y festiva, rutes pa descubrir Asturies ya información sobro los caminos hestóricos que pasen o escomencipien en Xixón, como son el Camín de Santiago, la Ruta Vía de la Plata o’l Camín a Cuadonga.

Esta aición de promoción busca asociar el destín Xixón a una de les marques de viaxes más fuertes a nivel nacional ya internacional como ye Lonely Planet. Con más de 500 títulos, les guíes Lonely Planet son les más vendíes del mercáu. La revista Lonely Planet ta presente en 11 países.

Contador Estadistiques