Xixón sacó'l paragües pa reclamar la oficialidá

|
Manifestación oficialidá 6-A

La demanda d'oficialidá del asturianu y gallego-asturiano retumbó en too Xixón. Miles de persones, a pesar del agua que cayó mientres tola tarde del sábadu, salieron a la cai pa reclamar la igualdá de los derechos de los falantes d'estes llingües colos de castellanu.

Tolos sindicatos mayoritarios y numberosos coleutivos acudieron a la llamada de la Xunta pola Defensa de la Llingua Asturiana (XDLA), qu'escoyó Xixón nesta ocasión pa manifestase depués de la esitosa convocatoria del añu pasáu n'Uviéu. Ente los presentes tuvieron les cabeces de llista pa les eleiciones Nacionales del 26 de mayu de Podemos y de la coalición d'izquierda Xunida (IX) con Izquierda Asturiana (IAS) Lorena Gil y Ángela Vallina, mientres que pela FSA-PSOE dexóse ver María Luz Pontón, secretaria d'Educación, Universidaes y Normalización Llingüística.

Adrián Barbón, secretariu xeneral y candidatu socialista, nun acudió al coincidir la manifestación con otru actu de la so axenda, según treslladó a la Xunta pola Defensa de la Llingua Asturiana (XDLA). Andecha Astur, #LluchandoPolaSoberanía y un Bloque Mozu que zarró la marcha col acompañamientu de música, animaron la marcha glayando lemes a favor de la oficialidá.

Tamién se dexó ver una pancarta de 'Lliberales pola oficialidá', con reconocíos asturianistes como Inaciu Iglesias, Humberto Gonzali o José Suárez Arias-Cachero 'Felechosa'.

El Náutico quedó pequeñu

La marcha finó n'El Náutico, onde la presentadora Sonia Fidalgo y l'actor José Antonio Lobato lleeron el manifiestu de la convocatoria. La tambascada que cayó darréu provocó que les actuaciones previstes tuvieren que suspendese, dando tiempu namái a sentir un cantar de Marisa Valle Roso enantes de que marchara la lluz.

La XDLA calculó una asistencia a la marcha asemeyada a la del añu pasáu n'Uviéu. Naquella ocasión falóse d'una cifra d'ente 20.000 y 30.000 persones.

Na semeya, la plaza d'El Náuticu enllena mientres centenares de manifestantes siguíen llegando

Contador Estadistiques