Xixón pon enfotu nel emplegu del asturianu nel mundu empresarial

|
Cartelu xornada ‘L’asturianu nel mundu empresarial. Un llabor en comuña’

La Oficina de Normalización Llingüística, en cumplimientu del Plan de Normalización Llingüística 2016-2019, va poner enfotu esti 2019 nel espardimientu del usu del asturianu nel mundu empresarial. Como primer pasu, va entamar una xornada’l miércoles 3 d’abril nel Antiguu Institutu con un taller práuticu y dos conferencies.

Baxo’l nome de ‘L’asturianu nel mundu empresarial. Un llabor en comuña’, esta iniciativa va dar a conocer iniciatives entamadores y profesionales qu’usen davezu l’asturianu nos sos productos, servicios y rellaciones colos veceros, amás de promocionar l’idioma como marca de calidá y diferenciación. A les 12 hores, la responsable del serviciu María Xosé Rodríguez López y la téunica Alba A. Estrada van poner el taller práuticu ‘Emplegu del asturianu na documentación y nel día a día de la empresa’, mentes que les charres tán previstes pela tarde.

Los convidaos son Inaciu Iglesias, conseyeru delegáu de Cartonajes Vir, que va falar a les 18 hores de ‘L’asturianu como seña d’identidá y valor añadíu nel mundu empresarial’, y David M. Rivas, profesor d’Estructura Económica de la Universidad Autónoma de Madrid, que va esponer darréu ‘La llingua como valor económicu’. “Queremos facilitavos les ferramientes pa que podáis usar l’asturianu na vuesa imaxe corporativa, na rotulación y publicidá, nes actividades comerciales y nes relaciones col personal de la empresa y cola vecería”, anuncien a los entamadores del conceyu dende la Oficina de Normalización Llingüística.

Contador Estadistiques