Sidra de cuatro continentes nel VII Salón Internacional de les Sidres de Gala
|
20 Setiembre, 2017 por Redacción
Los díes 29 y 30 de setiembre y 1 d’ochobre, 15 países de cuatro continentes van afayase nel VII Salón Internacional de les Sidres de Gala.
Un añu más torna una de les cumes más importantes de les sidres de copa a nivel mundial. Los díes 29 y 30 de setiembre y 1 d’ochobre vinientes, 15 países de cuatro continentes van afayase nel VII Salón Internacional de les Sidres de Gala (SISGA 2017), un alcuentru nel que ellaboradores de proyeición másima amuesen y ufierten los sos productos más destacaos ya anovadores nun congresu enllenu d’actividaes pa productores y pal públicu en xeneral.
Demientres los tres díes del VII SISGA la Fundación Asturies XXI, organizadora del eventu, entamará un programa completu d’actividaes pa puxar y afondar nesta bébora.
El SISGA ye un eventu que busca la rentabilidá, el conocimiento y la difusión real de los tipos nuevos de sidra; non un escaparate simple o amuesa de percorríu curtiu. Poro esti congresu convirtióse nun ágora na que converxe una profusión auténtica de profesionales y de conocimientos sobre esta bébora, que cada añu algama estándares altos de calidá, y que ta a l’altor de toles propuestes gastronómiques.
La preba abierta al públicu sedrá’l sábadu 30 de setiembre na Colexata de San Xuan Bautista en Xixón de 12:00 a 21:00 hores. Tolos ellaboradores tendrán estands separtaos nos que van amosar y darán a prebar los sos productos.
