Retiren d’una piscina municipal la cartelería n’asturianu

|
Campaña 'En Gijón, el deporte siempre contigo'

Iniciativa pol Asturianu tien constancia de qu’al menos un centru deportivu municipal, en concretu una piscina, retiró la cartelería n’asturianu, lo que provocó protestes d’usuarios. En contraposición a lo qu’asocede con EMTUSA, el Patronatu Deportivu Municipal da pasos atrás na visibilización de la llingua asturiana.

“Nun podemos permitir que se dean pasos atrás na presencia del asturianu nos espacios municipales y que les campañes incumplan l’usu de la toponimia oficial y del asturianu, tal y como s’establez nel Plan de Normalización aprobáu pa esti mandatu y qu’otres conceyalíes tán cumpliendo. Esto nun ta asociendo na campaña ‘En Gijón, el deporte siempre contigo’, que se pue ver nestos momentos pela cartelería urbana de Xixón y en munchos otros aspectos, como la visibilidá del topónimu nos estadios y polideportivos y nes equipaciones deportives patrocinaes, onde pasu ente pasu foi desapaeciendo la forma Xixón, presente dende va años” apuntó Xuan Fernandi, representante d’Iniciativa pol Asturianu nel Conseyu Asesor de la Llingua del Conceyu de Xixón.

Al menos una piscina municipal retiró la cartelería n’asturianu, “desconociendo los mesmos trabayadores del espaciu cuálu yera’l motivu”, apunta. “Dende Iniciativa pol Asturianu pidimos al Conceyu de Xixón mantener la cartelería n’asturianu y una mayor presencia del idioma nes sos campañes deportives”, pa lo que ponen d’exemplu l’usu que ta faciendo de la llingua asturiana la Empresa Municipal de Tresportes Urbanos (EMTUSA).

“L’asturianu tien que tar con normalidá en toles estayes municipales”, sentencia Fernandi.

Na semeya, un cartelu de la campaña ‘En Gijón, el deporte siempre contigo’.

Contador Estadistiques