Recuerdos d'un pasáu gloriosu

|
Plantiya del Sporting-Torino palcu contra'l Numancia

La mayor parte de los componentes de la plantiya que compitió col Sporting per primer vegada n'Europa recibió un candial homenaxe de l'afición. Mientres la fin de selmana los Doria, Joaquín, Ferrero, Cundi o Rezza, xunto col téunicu Miera, participaron en dellos actos en recuerdu al cuarentenu aniversariu del Sporting-Torino.

El momentu más emotivu foi'l vienres, nel Palaciu de Congresos del Recintu Ferial Luis Adaro, cuando tolos protagonistes, sacante l'ausencia de los finaos Enrique Castro 'Quini', Jesús Castro, Tati Valdés, José Manuel y Urbano, y dalgunos otros por dellos motivos, como Ciriaco Cano o Uría, recordaron énte mediu millar d'aficionaos aquel partíu disputáu'l 13 de setiembre del 1978 que finó con trunfu de 3-0 con un gol olímpicu de Ferrero y dos tantos de Morán, que nun aportó a tiempu al actu por temes de trabayu pero que sí acudió al restu d'eventos. Rezza y Doria, llegaos dende Arxentina, y Abel, Cundi, Joaquín, Andrés, Jiménez, Ferrero, David, Claudio, Pedro, Redondo, Javi y González, amás del entrenador Vicente Miera, recibieron el calor de los presentes.

El sábadu, l'Asociación Anselmo López, organizadora de los actos xunto col club, desatapaba un panel na grada este d'El Molinón que recordaba, con semeyes y datos, esti históricu partíu col que'l Sporting debutaba na Copa UEFA. Yá'l domingu, los ex xugadores salieron al campu a saludar enantes del comienzu del partíu de Lliga col Numancia (1-1), que presenciaron dende'l palcu presidencial.

Na semeya, integrante de la plantiya que s'enfrentó al Torino nel palcu presidencial d'El Molinón.

Contador Estadistiques