Podemos Asturies recuerda a Sánchez cuatro cuestiones pendientes del Gobiernu col conceyu

El documentu ‘30 demandas al nuevo Gobierno. Asturies merece un cambio’ que Podemos Asturies tresllada al presidente Pedro Sánchez inclúi cuatro cuestiones pendientes nel conceyu: l'Autopista del Mar, los accesos a El Musel, el Plan de Víes y la depuradora del este. Ente'l restu de reclamaciones ta la creación de la especialidá docente d'asturianu o la supresión del peaxe del Güerna.

Daniel Ripa y Jara Cosculluela acudieron a la Delegación del Gobiernu estatal n’Asturies pa rexistrar el dossier que detalla "una serie de deberes pendientes col nuesu territoriu que tien Pedro Sánchez dende’l minutu ún de pisar La Moncloa”, espresa la covocera d’Organización de Podemos Asturies". En total son 30 cuestiones del calter nacional y llocal pendientes cola so respeutiva esplicación, siendo la más destacada pol secretariu xeneral la supresión del peaxe del Güena porque “daña la economía d’Asturies”.

No que respeuta a Xixón hai referencia direuta a cuatro cuestiones. La primera ye apostar pola Autopista del Mar ente la nuesa ciudá y el puertu bretón de Naunnt-Saint-Nazère "porque ye un recursu fundamental pa que la nuesa tierra pueda crear riqueza", faciendo referencia a El Musel o la ZALIA.

Nel mesmu sen demanda un compromisu al Executivu socialista pa "finalizar la meyora nos diferentes accesos de El Musel y revertir el recorte del 30 por cientu d'inversión que fixo'l PP nesta infraestructura respeuto a los presupuestos del 2017", dalgo imprescindible "pa nun desaprovechar el costu eleváu que supunxo l'ampliación de la infraestructura". La execución del Plan de Víes, "una necesidá pa los ciudadanos de Xixón que nun pue esperar", y la puesta en marcha de la depuradora del este, qu'amás del dañu medioambiental que ta provocando la so paralización perxudica "la imaxe turística de Xixón" complenten les necesidaes inmediates del conceyu pa Podemos.

Especialidá docente

La modificación del Real Decretu 1594/2011, de 4 de Payares, y el Real Decretu 1834/2008, de 8 de Payares “pa que se reconozan n’Educación Primaria y Secundaria les especialidaes docentes de les llingües propies d’aquelles comunidaes que, anque nun tengan reconocíes diches llingües como oficiales, dispongan de proteición llegal y manifiesten la so voluntá de desarrollales” ye otra de les demandes de Podemos al Executivu socialista nuevu, cuestión que taba bloquiada pol PP dende’l Ministeriu d’Educación y Cultura. La dotación de perres pal Prerrománicu, el desarrollu de la rede de cercaníes, la ellaboración y execución d’un Plan de Patrimoniu Industrial Asturianu, la finalización de les obres de la variante de Payares y de l’Autovía A-63 (Uviéu-La Espina), y el cumplimientu de los compromisos coles cuenques mineres tán tamién recoyíes nel documentu.

Semeya: Por Bafpg [CC BY-SA 4.0 (https://creativecommons.org/licenses/by-sa/4.0)], dende Wikimedia Commons.