Muñiz arrenuncia al so acta de conceyal, anque siguirá na presidencia de Foro Xixón

|
Ana Braña, Jesús Martínez Salvador, Álvaro Muñiz y Rubén González Hidalgo

Con 3 conceyales algamaos nes eleiciones del 26-M, Álvaro Muñiz decidió arrenunciar al so acta de conceyal y dar pasu al númberu 4 de la llista, Rubén González Hidalgo. El presidente de Foro Xixón, que va siguir al frente del partíu al igual que Carmen Moriyón n'Asturies, afirmó que “el talentu ha de tar na corporación nueva”.

“Toi seguru que l’equipu formáu por Jesús Martínez Salvador, Ana Braña y Rubén Hidalgo ye l’únicu nel Conceyu que podrá realizar una oposición de calidá, con conocimientos de lo que Xixón necesita”, aseguró tres anunciar una decisión idéntica a la de Moriyón, presidenta nacional de Foro, candidata a la Xunta Xeneral y alcaldesa en funciones. “Siguiré al frente de Foro Xixón como presidente del partíu a nivel llocal, y taré metíu al 100 por cien en tolo qu’asoceda nel Conceyu de Gijón y nel grupu municipal de Foro Xixón”, añadió.

Foro pasó’l domingu de ser el partíu más votáu, con 36.235 votos (un 25,59 por cientu del total), y gobernar nel conceyu por segunda llexislatura siguida a ser la tercer fuercia, con 16.803 apoyos (12,37 por cientu), siendo superáu pol PSOE y Ciudadanos. No que respeuta al númberu d’ediles, baxa de 8 a 3.

El cuartu conceyal, que va sustituyir a Muñiz, ye González Hidalgo, xerente del Parque Científicu y Teunolóxicu, que nun primer momentu sonó pa la llista nacional. “Dende la mio responsabilidá como presidente voi siguir trabayando para fortalecer a Foro en Xixón, el partíu que gobernó para tola ciudadanía y qu’aspira a volver a liderar el centru políticu de la ciudá”, concluyó Muñiz.

Na semeya, Braña, Martínez Salvador, Muñiz y González Hidalgo.

Contador Estadistiques