Los abonaos del Sporting pagarán 15 euros pa ver el partíu de Copa col Valencia

|
Designaciones arbitrales octavos ida Copa Sporting-Valencia

Na tarde del xueves van ponese a la venta les entraes pal partíu d’ida de los octavos de final de la Copa qu’enfrenta al Sporting col Valencia de Marcelino, programáu pal martes a les 21.30 hores. Los abonaos han de pagar un suplementu 15 euros, mentes que pal públicu xeneral el preciu va ente los 25 y 40 euros.

Col permisu del Zaragoza, que visita El Molinón el sábadu a les 16 hores, l’afición del Sporting yá tien en mente el duelu de Copa nuna ronda que los xixoneses hai diez años que nun pisen. El siempre caprichosu bombu crució a los de José Alberto col Valencia, rival que vien de competir en Lliga de Campeones de la mano d’un téunicu de Mareo como Marcelino García Toral.

Les incomprensibles normes de la competición copera obliguen al equipu d’inferior categoría a xugar nesta ronda’l primer partíu en casa, polo que, a pesar de lo que dictó’l sortéu, el Valencia va poder disputar el choque decisivu de la eliminatoria en Mestalla. N’El Molinón, poro, va tener llugar la ida esti martes con entraes que se van poner a la venta a partir de les 17 hores d’esta tarde.

Los abonaos roxiblanco han de pagar 15 euros pa poder acudir al partíu, con entrada de baldre pa los ‘Socios d’honor’ (50 años siguíos), los ‘Socios de plata’ (25 años) y los de categoría Junior, esto ye, menores de 12 años. El preciu pal públicu xeneral va ser de 25 euros nes graes norte y sur, y na tribuna norte; de 30 na este y na tribuna sur; y de 40 na Tribunona. Pa conocer los horarios de venta o mercales en llinia ha de calcar nesti enllaz.

Estrena del VAR

Esti partíu será'l primeru n'El Molinón nel que se va emplegar la figura del Árbitru Asistente de Videu, conocíu poles sos sigles n'inglés: VAR. El bercianu José Luis González González va encargase d'esti llabor nun choque que va tar dirixíu pol navarru Alberto Undiano Mallenco.

Contador Estadistiques