L’aviespa asiática yá ta instalada en Xixón

|
L’aviespa asiática yá ta instalada en Xixón

El Xardín Botánicu Atlánticu ye’l primer llugar del conceyu onde se capturó a una reina d’aviespa asiática, especie invasora que supón un peligru pa les abeyes llocales, tres atopar el so ñeru. L’insectu tamién aportó a la ciudá, yá que poco depués apaeció otru en Montevil.

L’alarma saltó’l sábadu, col descubrimientu d’un ñeru na instalación botánica asitiada en Cabueñes. Ésti entovía yera embrionariu y nél se pudo capturar a la reina, evitando asina la so propagación.

Dos díes más tarde, el llunes, un vecín de Montevil denunciaba la presencia nel so balcón d’otru ñeru n’estáu de creación. Nesta ocasión nun se capturó a la reina al fuxir ésta tres emplegar el propietariu un insecticida.

Ésta ye la primer vegada que se deteuta una reina en Xixón, anque hai constancion de la presencia de l’aviespa asiática, o vespa velutina pol so nome científicu, dende agostu del 2017. L’insectu entró nel país pel occidente, siendo San Tiso d’Abres el primeru nel que se pudo ver en xunu del 2014.

Depredador

La peligrosidá que trai l’aviespa asiática, de menor tamañu que la europea, ye que se trata d’un gran depredador. Ún de los sos víctimes preferíes ye l’abeya, animal clave pa la polinización del campu, que sirve d’alimentu pa les sos gates.

L’Área de Medio Ambiente y el Xardín Botánicu de Xixón veníen collaborando precisamente cola plataforma Stop Velutina pa concienciar a la población sobre la presencia d’esti insectu, con campañes como la edición de videos didáuticos que se presentaron la selmana pasada pa identificar a l’aviespa y crear trampes caseres contra ella.

Na semeya, una reina d'aviespa asiática. Semeya obra de Francis Ithurburu baxo llicencia CC BY-SA 3.0.

Contador Estadistiques