La zona ente Les Mestes y la desaguada del Piles, la más contaminada del ríu

|
Ríu Piles

El problema de contaminación del Piles ta na zona ente Les Mestes y la desaguada del Piles, apunten dende’l Conceyu. La EMA va revisar el saniamientu de too esti tramu tres los análisis fechos pola empresa cola intención d’iguar esta situación enantes del branu.

Les muestres tomaes en cinco puntos del ríu ente la ponte y el Palaciu de Deportes en condiciones asemayes en cinco feches diferentes –ente’l 24 de setiembre y el 9 d’ochobre– amuesen esmolecientes altos niveles de la bactería E. coli y n’enterococos, mui superiores a los normales. Ello va llevar a una revisión la rede de saniamientu de tola zona pa dar con un problema que yá yera sabío qu’esistía dende’l Recintu Ferial Luis Adaro, pero que nun ye esclusivo d’esta instalación daes estes cifres.

La EMA tamién va entamar un estudiu hidrobiolóxicu sobre les algues en coordinación cola Conseyería de Mediu Ambiente y Movilidá, y la Confederación Hidrográfica del Cantábricu va facer análisis trimestrales na zona de so competencia, esto ye, hasta Les Mestes. La intención del Conceyu ye qu’enantes del branu tea solucionada esta situación qu’afeuta a la sablera de San Llorienzu.

Contador Estadistiques