La XDLA presenta'l PROYECTU 2018 pola oficialidá

Va ser esti sabadu 23 en Xixón y ta confirmada la asistencia de representantes de los principales partíos parllamentarios y sindicatos mayoritarios, el rector de la Universidá d'Uviéu y el presidente de l'Academia de la Llingua Asturiana, amás d'alcaldes y conceyales de los principales conceyos del país. Pretenden buscar que nel añu viniente s'abra la reforma del Estatutu d'Autonomía pa incluyir la oficialidá del asturianu y gallego-asturiano.

La Xunta pola Defensa de la Llingua Asturiana (XDLA) va presentar esti sabadu 23 de setiembre a les 12 hores na vieya Escuela de Comerciu de Xixón (c/ Tomás y Valiente) la so campaña PROYECTU 2018 pola oficialidá.

Con esta campaña pretenden buscar que nel añu viniente s'abra la reforma del Estatutu d'Autonomía al traviés del artículu 56.1 del mesmu, que permite facelo por mor d’un pidimientu de los conceyos o d’una cuarta parte del Parllamentu. D’esta forma, preténdese incluyir en dicha reforma la oficialidá del asturianu y gallego-asturiano. La XDLA pretende con esta campaña poner l'asuntu llingüísticu na primer páxina de l'axenda política del país.

Dende la so presentación pública en mayu, nel marcu de la Selmana de les Lletres Asturianes, la XDLA vien calteniendo contautos con responsables políticos p’algamar el mayor consensu posible pa llevar alantre la iniciativa y pa esta presentación del día 23 yá tienen confirmada la so asistencia al actu diputaos autonómicos na Xunta Xeneral y diputaos por Asturies nel Congresu de los Diputaos, secretarios xenerales y representantes de los principales partíos parllamentarios y sindicatos mayoritarios, el rector de la Universidá d'Uviéu y el presidente de l'Academia de la Llingua Asturiana, amás d'alcaldes y conceyales de los principales conceyos del país.

El respetu pola llingua asturiana ya caltrió ente los sectores más civilizaos de la sociedá, camienten dende la XDLA y consideren qu'agora falta esi reconocimientu oficial pa poder siguir el camín hacia la normalización de la llingua na vida de los asturianos y les asturianes. Por eso, "urxe adaptar el marcu llegal del asturianu y del gallego-asturianu a la realidá del sieglu XXI: la normativa europea esíxelo, les nueves formes de comunicación fáenlo imprescindible".

Dende la Xunta pola Defensa de la Llingua Asturiana (XDLA) consideren que nesta llexislatura, con una representación parlamentaria favorable a la oficialidá la más abultada de la historia del parlamentu autonómicu, ye'l momentu pa llograr la oficialidá de la nuesa llingua. Convidando a la sociedá civil a participar nesti actu yá que "tenemos la responsabilidá d'actuar pa inclinar la balanza de les decisiones del llau de la xusticia, ye llabor del pueblu asturianu convencer a les y los que falten pa materializar la dignificación normativa que la llingua asturiana necesita".